El 48 FICXixón avanza parte de la so programación

27 setiembre 08:44 2010 Imprimir

La edición númberu 48 del Festival Internacional de Xixón va cuntar con delles novedaes, que fueron avanzaes yá. Ente los conteníos nuevos, lo más nuevo del cine español, que davezu nun solía tener espaciu nel FICXixón, un alcuentru internacional de productores, homenaxe a la Escuela de Berlín y la tevisión de la obra d’Eugène Green. Sicasí, estes son namás dalgunes de les novedaes, munches otres tán tovía por descubrir y van poder vese ente’l 19 y el 27 de payares nos cines de Xixón.

Ciclu Escuela de Berlín

Per primer vegada nel estáu español un festival alluma una xeneración de cineastes alemanes que, baxo la denomación d’Escuela de Berlín, comparten les llinies maestres d’un cine sobriu, realista y ensin concesiones. Esti ciclu, organizáu pol Goethe Institut, va ser una bona oportunidá pa examinar los referentes ya influencies d’un grupu de lo más variao que non siempres s’identifica col títulu; con nomes que surden de la Deutsche Film und Fernsehakademie Berlin, como Christian Petzold, Angela Schanelec y Thomas Arslan (qu’entamaron el grupu), y dellos direutores que magar nun se formaran na mentada DFFB, tán ensin dulda venceyaos, como Valeska Grisebach, Ulrich Köhler y Maren Ade.

El programa inclúi Yella, de Christian Petzold, ganadora de dos premios en Berlín en 2007; Bungalow, d’Ulrich Köhler, ganadora nel BAFICI, y les últimes películes d’Angela Schanelec (Orly) y Thomas Arslan (Im Schatten), y títulos comoLonging, de Valeska Grisebach, Meyor Película nel 44 FICXixón y Entre nosotros, de Maren Ade, que s’estrenó equí va poco.

El cine español torna al FICXixón

Ye la primer vez en quince años que trés de les películes que van competir na Sección Oficial lleven sellu español: Todas las canciones hablan de mí¸ de Jonás Trueba, La mitad de Oscar, de Manuel Martín Cuenca y Todos vós sodes capitáns, d’Oliver Laxe. Los tres son parte del cazumbe nuevo de la industria audiovisual nacional.

Dempués de roblar guiones de películes como Vete de mí y El baile de la victoria,Jonás Trueba (Madrid, 1981) aporta a la competición de Xixón cola so primer obra,Todas las canciones hablan de mi, cinta producida por Gerardo Herrero y protagonizada por Oriol Vila y Bárbara Lennie. La mitad de Oscar ye la vuelta a la ficción de Manuel Martín Cuenca (El Ejido, 1964). Colos sos documentales y llargumetraxes, el direutor de La flaqueza del bolchevique y Malas temporadas suma múltiples premios en festivales internacionales.

Oliver Laxe (París, 1982) va presentar la so ópera prima, Todos vós sodes capitáns,cola que consigó’l premiu Fipresci na Quincena de Realizadores de Cannes. Esti realizador participó en Llendes na 44 edición col curtiu Grrr! Nº7:… y las chimeneas decidieron escapar, codirixida con Enrique Aguilar.

D’otru llau, Rellumes va tener como representante española La vida sublime, deDaniel Vázquez Villamediana, que percorrió’l circuitu de festivales col so llargu anterior, El brau blau.

  Article "tagged" as:
  Categories:
Loading Facebook Comments ...