El 40% de los estudiantes de segundu de bachilleratu nun saben qué carrera estudiar

El 40% de los estudiantes de segundu de bachilleratu nun saben qué carrera estudiar
27 febreru 14:11 2019 Imprimir

El conseyeru d’Educación y Cultura d’Asturies, Genaro Alonso, señaló qu’el 40 per cientu de los estudiantes de segundu de Bachilleratu asturianos nun tienen claro qué titulación estudiar cuando rematen el cursu, ente que un 20 per cientu decántense polos estudios clásicos como Medicina, les filoloxíes o derechu, y un 12% embaraxen estudiar disciplines rellacionaes coles Tecnoloxíes de la Información.

A la lluz d’estos datos, el conseyeru destacó la importancia de desenvolver xornaes d’orientación como la que se taba celebrando esti martes nel Palaciu de Exposición Ciudá d’Uviéu, nel qu’a lo llargo de la mañana los estudiantes pudieron conocer toles carreres qu’ufierta la Universidá d’Uviéu. Alonso esplicó qu’esta xornada naz pa facilitar l’alcuentru ente los alumnos y les distintes disciplines,  con cuenta d’empobinalos.

Pa ello’l rector de la Universidá, Santiago García Granda, considera necesariu «ameyorar» los programes d’orientación non solo empuestos a los alumnos del últimu cursu, sinón tamién a etapes educatives previes como Secundaria o inclusive ente los más pequenos, al traviés d’iniciatives como la Universidá para peques» impulsada pola institución académica asturiana.

Tamién trabaya la Universidá n’empobinar a les alumnes por que sepan que «puen estudiar lo que quieran si se-yos da bien y gústa-yos», pa romper asina cola preferencia de les muyeres d’emponer los sos estudios escontra les ciencies sociales y disciplines rellacionaes col cuidu a los demás. Pal rector ye «bien importante» qu’el 50% del alumnáu de carreres de ciencies sían muyeres. «Lo importante ye que cada unu conoza les sos capacidaes y vaiga a aquella titulación pa la que tea meyor preparáu porque va esfrutar más», señaló.

Precisamente no rellacionao coles capacidaes de los alumnos ye onde’l rector considera más necesariu actuar. Agora mesmu, esplicó, los alumnos y los padres tienen tola información al so algame, pero ye necesariu, por qu’escueyan bien la formación que van cursar, que conozan les sos capacidaes. Asina, esplicó que «non tol mundu, anque tenga bona nota, tien d’estudiar medicina». «La vocación informada ye bien importante», destacó.

  Categories: