El 31 d’esti mes fina’l plazu pa presentase a los Premios Uviéu de lliteratura

Va quedando menos tiempu pa presentase a la segunda edición de los premios lliterarios n’asturianu que convoca la Conceyalía de Cultura del Conceyu d’Uviéu nes modalidaes de Narrativa, Teatru y Poesía y que l’añu pasáu llevó na modalidá de poesía Esther García. El concursu ta abiertu a toles persones interesaes, siempre que les obres presentaes sían orixinales ensin asoleyar y tean escrites en llingua asturiana.

Los premios tienen una dotación económica de cuatro mil euros caún, sacantes el de Narrativa, que xube hasta los siete mil quinientos euros, el premiu más altu pa obra n’asturianu. Amás del premiu, el Conceyu d’Uviéu va editar les obres premiaes de narrativa y poesía y favorecer la estrena por grupos de teatru de la obra ganadora. El 31 de xineru termina’l plazu pa presentase.