El 25% del alumnáu de FP y Bachiller cree qu’entá nun esiste’l puestu nel que va trabayar

El 26,7% de los estudiantes españoles de Formación Profesional y Bachilleratu considera que va trabayar n’un cuidao que inda nun esiste y un 59,3% cree que lo fadrá fora d’España, según l’informe ‘El futuru llaboral de los mozos’ de la Fundación AXA y Educa 2020.

Estes son dalgunes de les conclusiones d’esti trabayu que se basa n’una encuesta a de 12.000 alumnos españoles d’ente 16 y 19 años, realizada por GAD3, ente xineru y abril d’anguaño, que se presentó esti mes en Madrid. Nel actu presentación participó la secretaria d’Estáu de Ciencia, Carmen Vela, que destacó la importancia de la orientación a los mozos españoles nel sistema educativu.

“La educación tien que faer esti abordaxe. Precisamos preparar la mente de quien tenga que trabayar, dici-y que nun lo va a faer solu y na so área, sinón n’equipu”, sorrayó Vela, que, al so xuiciu, España va precisar “cada vez más” nel mundu llaboral materies combinaes, onde la investigación “ye la punta de llanza”. “¿Cómo vamos faer la salú solo con médicos?”, preguntó, p’añedir que “los problemes nun se van poder resolver con una única disciplina”.

Ye precisamente la orientación uno de los problemes sobro los que llama l’atención esti documentu y nel que’l director de GAD3, Narcisu Michavila, punxo l’acentu. “Hai un déficit d’orientación profesional”, sorrayó esti espertu, que destacó, sicasí, que los estudiantes de FP tienen más claru en qué sector trabayar porque cunten con más información frente a los de Bachilleratu. “L’alumnu de FP yá se decantó escontra lo que-y gusta y la so formación ye más práctica”, añedió.

La gran mayoría de los alumnos de Bachilleratu (85%) quier estudiar un grau universitariu, un 11% un módulu de FP de grau cimeru y namái un 3% quier trabayar en rematando esta etapa educativa. Más de la metá de los estudiantes de FP, otra manera, quieren siguir estudiando un grau cimeru, namá’l 9,7% plantega dise a la Universidá y casi un terciu (31%) quier trabayar al terminar el grau mediu.

A la entruga de si tienen pensáu estudiar fora d’España tres la Secundaria, solo’l 16% se lo plantega, una respuesta qu’oldea con que una mayoría (59,3%) cree que va desenvolver parte de la so carrera profesional nel estranxeru. “Ye verdá que n’España somos bien conservadores pero la xeneración actual ye xuna sociedá global”, señaló Michavila, qu’esplicó que magar casi toos quieren estudiar n’España, asumen que van trabayar fuera unos años.

Los estudios cimeros de Ciencies Sociales y Xurídiques son los preferíos (44%), siguíos de los de Ciencies de la Salú (23,9%), Inxeniería y Arquitectura (16,7%), Ciencies (10,5%) y Artes y Humanidaes (4,8%). Según Michavila, los alumnos de Bachilleratu, al nun tener claro la so carrera profesional, escueyen titulaciones polivalentes como Alministración y Dirección d’Empreses, que s’atopen na caña de les Ciencies Sociales.