Educación ye’l gastu que más xorreció mientres la crisis

El barómetru de consumu Barclaycard-IESE presentáu esti martes señala que el consumidores echaron más la mano al bolsu n’árees como la educación demientres los años de la crisis.

Ente 2007 y 2014 aumentó’l gastu nesti conceutu un 37%, siguíu de l’agua, gas, eletricidá y teléfonu (21%) y la sanidá (13%). L’estudiu mentáu non desglosa los motivos que llevaron a la educación a liderar l’aumentu del gastu, magar l’autor del informe, Rolf Campos, apuntó al mayor gastu en cursos de posgrado nuna redolada de crecedera del desemplegu como principal motivu.

L’estudiu, ellaboráu a partir de datos de la Encuesta de Presupuestos Familiares del INE, señala qu’otros sectores vieron como les sos vientes cayíen drásticamente: la xoyería perdió un 58% de los sos ingresos, siguíu del moblame y equipamientu del llar, con una cayida del 37%, el de la ropa y el calzáu col 29% y el de la restauración y l’ociu col 24%.

El consumu n’España cayó nesi periodu un 8,6%, y les comunidaes onde más se sintió la crisis nel consumu nesi periodu fueron Baleares (-16,5%), Canaries (-15,2%) y Murcia (-15%) y en que les que menos, Estremadura (-0,4%), Aragón (-0,5%) y País Vascu (-1,1%).

En términos absolutos, el mayor gastu producíase n’alimentos y bébores, siguíu d’agua, gas, eletricidá y teléfonu, restoranes y ociu, y carburantes y llubricantes.