Portada Educación Educación va reforzar n’Asturies con 511 aules covid y 530 docentes

Educación va reforzar n’Asturies con 511 aules covid y 530 docentes

by redacción asturnews

Esti martes entamaba n’Asturies el cursu más estrañu y el más difícil, el cursu de la covid-19., siendo la única comunidá na que los escolares entá nun tornaren hasta esi díua a les aules, cola idega d’aprender de los qu’abrieron antes, especialmente d’eses 700 incidencies rexistraes nes casi dos selmanes de clase, incidencies qu’inclúin el zarru de 656 clases y 120 centros educativos.

N’Asturies, tornaron esti martes los estudiantes d’Infantil y Primaria. En total, 63.929 alumnos, de los qu’un 71,4% alleguen a la rede pública. El cursu de la covid ye tamién el d’un nuevu descensu de matrícula, la baxa natalidá refléxase una vegada más y n’anguaño 2020-21 la rexón cunta con 1.648 alumnos menos que l’anterior, un descensu notable. Según les cifres qu’ayeri facilitó la mesma Conseyería d’Educación, los centros públicos cunten con 32.510 alumnos y alumnes d’Educación Primaria y 13.145 del segundu ciclu d’Infantil (3 a 6 años). La rede alcordada tien 12.729 matriculaos en Primaria y 5.545 nel segundu ciclu d’Infantil (los colexos privaos de la rexón yá empecipiaron el cursu, anque nun tienen dexáu adelantrar materia).

Hai menos alumnos, pero más aules, porque la covid obligó a faer grupos burbuxa y el Principáu decidió llindar la ratio a 20 estudiantes per aula. Eso supunxo dellos desdobles y la creación de non poques aules internivel, los polémicos grupos nos que s’entemecen neños de dos cursos (por casu, primeru y segundu de Primaria). En total, habilitáronse 511 aules covid (295 na pública y 216 na alcordada), y contratáronse, según la conseyería, 530 docentes pa dambes redes (310 d’ellos pa la escuela pública y 12 pa los centros d’Educación Especial). Los sindicatos cuestionaron la cifra de contrataciones y, sía que non, denunciaron que nun son abondes.

Los númberos dirán completándose na próxima selmana, cuando s’incorporen tamién los estudiantes d’ESO, Bachilleratu y FP; a partir de segundu de Secundaria, con clases semipresenciales y allegando a los centros en díes alternos. «El compromisu del Principáu ye llegar a los 860 docentes de refuerzu» en tolos niveles. Pa les contrataciones, el Principáu destinó 30 de los daqué más de 40 millones d’euros que s’invirtieron en cubrir les necesidaes específiques d’esti cursu. Va unos díes el presidente d’Asturies, y ayeri mesmu la conseyera, Carmen Suárez, nunes declaraciones qu’unvió a los medios, destacaron esi esfuerzu económicu. Asturies recibió unos 33 millones d’euros del fondu especial covid del Gobiernu central. El restu del dineru salió del presupuestu rexonal.

Tamién te podria gustar