Educación va dexar clases d’Infantil y Primaria con más de 20 alumnos

Educación va dexar clases d’Infantil y Primaria con más de 20 alumnos
24 xunu 11:35 2020 Imprimir

El Gobiernu abrió un pocu la mano pa facilitar que tolos estudiantes de les enseñances non universitaries puedan allegar a clases presenciales en septiembre y atenciendo’l pidimientu que-y fixeron dellos conseyeros d’Educación, va autorizar que los grupos estables d’alumnos que se formen n’Infantil y en Primaria puedan superar el tope d’ente 15 y 20 escolares, que foi’l máximu primeramente establecíu.

Con esta cesión, los ministerios d’Educación y Sanidá, autores del protocolu frente al coronavirus de cara al próximu cursu, acepten la demanda d’una decena de comunidaes, que-yos dixeron que si nun-yos dexaben aumentar los grupos escolares nestos ciclos hasta los 25 estudiantes -que ye la ratio máxima llegal-, nun tendríen espaciu abondu p’acoyer en clase a tolos estudiantes.

Ye una de les novedaes principales qu’inclúi la guía d’encamientos hixénicu-sanitaries que’l Gobiernu unvió a tolos conseyeros d’Educación por que tengan un marcu común d’actuación de cara al entamu del cursu, y qu’agora cada autonomía va ser llibre d’afaer a la so realidá y a la de cada unu de los centros.

En realidá, la única midida de cumplimientu obligáu ye que la distancia mínima de seguridá ente pupitres y pa cualquier actividá, dientro o fora de clase, va ser de 1,5 metros. Ye la que les comunidaes van tener qu’aplicar a tolos estudiantes d’ESO, Bachilleratu y FP y tamién a los alumnos d’Infantil y Primaria que nun opten pola fórmula alternativa de los grupos estables de convivencia» qu’ufierta’l ministeriu.

El Gobiernu, como yá fixo nel borrador de la guía que s’aldericó na Conferencia Sectorial del 11 de xunu, autoriza a los colexos a escaecese n’Educación Infantil y Primaria de los 1, 5 metros y a crear grupos de convivencia, con non más de 20 alumnos (sacantes lo dexe cada autoridá sanitaria), y que van evitar el contactu con alumnos d’otres clases, incluyíu nel patiu o’l comedor.

A cambéu, estos alumnos, a los que la ministra asemeya nel so funcionamientu a un grupu familiar o de convivientes, van poder estudiar y xugar na aula ensin caltener distancia de seguridá dalguna nin usar mázcaru. Si se diriera dalgún positivu por coronavirus, el rastrexu d’andaes, diz el protocolu, sería senciellu. Como novedá, el protocolu definitivu amplía la posibilidá de formación d’estes burbuyes’ a tola Primaria -antes la llende yera 4º-, pero al tiempu encamienta qu’el so usu preferente sía más acutada, d’Infantil hasta 2º de Primaria (ocho años), porque «a eses edaes ye complicáu caltener la distancia de seguridá».

El documentu tamién realiza delles aclaraciones sobro les obligaciones con respectu de los mázcaros, de les qu’encamienta les de tipu hixénicu y reutilizables. Los únicos alumnos exentos en tou momentu d’utilizar esti mediu de protección van ser los d’Infantil.

  Categories: