Portada Educación Educación va convocar 506 places de Secundaria y FP en 2020

Educación va convocar 506 places de Secundaria y FP en 2020

by redacción asturnews

Educación va convocar 506 places de profesores de Secundaria y FP en 2020 pa ser a asitiar la tasa d’interinidá del profesoráu asturianu de los centros públicos nun 8%.

Esti ye unu de los principales oxetivos que la Conseyería d’Educación pretende algamar na presente llexislatura. Asina lo avanzó esta selmana la conseyera d’Educación, Carmen Suárez, mientres la comparecencia parlamentaria na que detalló la fueya de ruta del so equipu pa los próximos cuatro años. Un retu importante teniendo en cuenta que, na actualidá, el 30% de los de los docentes asturianos son interinos. Pa llogralo, el Principáu va sacar a oposición l’añu que vien 506 seis places de profesores de Secundaria, Formación Profesional (FP) y otres enseñances. D’elles, 392 places correspuenden a la tasa de reposición y 114 van ser places por estabilización. A esti procesu selectivu va sumase’l de los puestos de promoción interna y les places de catedráticos de Secundaria, entá por concretar. Sicasí, el Sindicatu d’Enseñanza de CC OO asegura que les places anunciaes «son insuficientes» y «apenes cubren les 400 xubilaciones producíes dende 2018».

Na so presentación d’oxetivos, Suárez abogó pol consensu p’algamar un pactu educativu n’Asturies. Un alcuerdu más enfocáu a «actuar sobre la metodoloxía y los procesos de formación» qu’a «reformar los currículos de la programación educativa». Pa la conseyera resulta prioritariu alcordar el papel que xuega la Formación Profesional en tolos sos ámbitos, «dende la básica a los ciclos cimeros». Ello ye que el Principáu preve impulsar una rede de centros integraos de FP, según intensificar «la conexón col ámbitu empresarial» pa fomentar la empleabilidá del alumnáu.

La nueva conseyera aseguró que va dar «una atención preferente a la escuela rural y al so profesoráu pa impulsar la so estabilidá y reconocer la so singularidá». Nesti marcu, la conseyera plantega «revisar los procedimientos d’axudicación y toma de posesión de forma que puedan resultar más axiloses».

Otru de los propósitos pa esta llexislatura de la conseyería d’Educación ye «doblar el númberu de places de la rede d’escueles de 0 a 3 años», según «la so estensión a aquellos conceyos onde esista demanda»,  cuantimás a los conceyos de la zona rural que la demanden. La conseyera aportunó en que la educación nesta etapa infantil supon un elementu esencial pa «la conciliación familiar» y pa «afitar de población en zones rurales». Lo que, enagora, nun preve’l Gobiernu asturianu ye aplicar la gratuidá del 0-3, nel que «un 70% de les families esfruta de la so gratuidá o paga un porcentaxe mínimu», indicó Carmen Suárez.

Suárez anunció que se preve rematar en 2021 les obres nel IES La Florida (Uviéu) y el de La Fresneda (Siero),  ente que’l proyectu del IES de La Corredoria lleva más retrasu. Tamién señaló la remodelación del IES Rei Pelayo (Cangues d’Onís), y les actuaciones previstes en centros como’l colexu Infanta Leonor (Castrillón).

Tamién te podria gustar