Educación va analizar la posible ampliación de la FP en Pravia

Educación va analizar la posible ampliación de la FP en Pravia
01 avientu 09:22 2021 Imprimir

El Principáu vieno acabante pronunciase sobro la propuesta del Conceyu de Pravia d’ampliar les enseñances de FP nel Baxu Nalón y va incluyila dientro d’analís de necesidaes de formación na comunidá autónoma que ta faciendo agora mesmu una previsible medría o cambéu de la ufierta.

El director xeneral d’enseñances profesionales, Javier Cueli, señaló esti día que «dientro d’esi analís atienden les demandes». Y ente elles la puesta sobre la mesa pol alcalde de Pravia, David Álvarez, que plantega la instauración de nuevos estudios, bien nel institutu de Pravia o bien n’otros centros que cunten con acreditación. La intención ye enfocar estes nueves titulaciones, bien sían ciclos o certificaos de profesionalidá, al sector agrícola, bien desenvueltu na zona gracies a la espansión del quivi, la faba y nueves variedaes frutales, y nel que les empreses señalen la falta de profesionales.

Precisamente coles empreses manifestó ayeri Cueli la intención de la Conseyería d’Educación d’entrevistase «pa conocer la demanda del sector». D’esta manera non solo’l Principáu va poder saber de primera esquito la esistencia d’esa necesidá, sinón tamién afondar nella pa poder saber qué tipu d’estudios riquiríase enllantar pa da-y solución. A priori, sicasí, inclínase polos certificaos de profesionalidá, tal que señaló antieri’l mesmu rexidor.

L’alcalde pravianu quier antemanase y formar profesionales agrícoles, una y bones el ritmu de crecedera del sector foi bien importante nos últimos años, debíu principalmente a los frutales, y la previsión ye que’l númberu d’esplotaciones siga a l’alza nos próximos años. Na actualidá na see praviana de FP impartir ciclos de grau mediu en Xestión Alministrativa y Cocina y Gastronomía y de grau cimeru n’Alministración y Finances y Dirección de Cocina. Agora esta ufierta quier ampliase pa sirvir al sector empresarial de la zona.

  Categories: