Educación ufierta esti cursu 779 actividaes formatives pal profesoráu

La Conseyería d’Educación y Cultura ufierta esti cursu 779 actividaes formatives pal profesoráu p’avanzar nun modelu educativu que garantice la igualdá.

L’anuncia fízola’l conseyeru Genaro Alonso, mientres la visita que realizó al Centru Autonómicu de Formación ya Innovación de Galicia. Alonso, que tuvo acompañáu pola subdireutora xeneral de Formación Profesional de la Xunta, María Eugenia Pérez, esplicó que les llínees prioritaries nesti ámbitu y les condiciones de participación de los docentes tán recoyíes nel Plan de Formación Permanente. Los cuatro centros del profesoráu y recursos que dependen del Gobiernu autonómicu son los encargaos de xestionar, asesorar y coordinar estos procesos formativos.

El Principáu aspira a “siguir avanzando nun modelu educativu que garantice la equidá y l’igualdá, por aciu la promoción d’un clima de convivencia positivu nos centros”. Tamién busca “fomentar l’estudiu y la sistematización de ferramientes tecnolóxiques aplicables a la docencia y al trabayu na aula”.

Ente les acciones formatives qu’impulsa’l Gobiernu y que llogren un mayor impactu destaca la Feria de la Innovación Educativa, un espaciu entamáu pa sopelexar los proyectos d’innovación educativa que se lleven a cabu en más de 90 centros d’Educación Infantil, Primaria, Secundaria y Formación Profesional.

Educación tamién destaca los proyectos de formación común, que se basen na collaboración ente grupos de trabayu de distintos centros que s’axunten pa encetar un mesma tema d’interés, y la formación pa los contratos programa, destinada al profesoráu de los centros adscritos al contratu programa, qu’establecen un alcuerdu de collaboración cola Conseyería p’algamar l’ésitu educativu de tol alumnáu.