Educación suspende una charra pa profesores sobro alumnos transexuales n’Avilés

Educación suspende una charra pa profesores sobro alumnos transexuales n’Avilés
14 febreru 18:54 2020 Imprimir

Taba previsto que’l Centru de Formación del Profesoráu d’Avilés acoyera ayeri una sesión formativa pa docentes  coles mires d’ufierta-yos ferramientes p’atender al alumnáu en situación de transexualidá. Finalmente’l taller nun se llevó a cabu per decisión de la conseyería d’Educación, que suspendió la sesión formativa a menos de venticuatro hores.

Tratase d’una formación gratuita impartida pola docente, sexóloga y política, Aitzole Araneta, que’l so oxetivu yera faer cavilgar a los docentes «sobre les respuestes que se-y pueden dar a neños, neñes y adolescentes en situación de transexualidá dende les alministraciones, conocer la normativa llegal al respeutu y analizar los protocolos educativos d’actuación en materia de transexualidá», esplica la mesma sexóloga, que reconoz llevase una desagradable sorpresa al enterase de la cancelación, «daqué que nunca me pasó hasta agora».

Según confirmó Araneta, esta formación taba prevista dende’l pasáu mes d’avientu y taben apuntaos sesenta profesores de tola contorna. «Cola poca información que tengo, nun esplico porqué púdose suspender y espero que nun tenga que ver col fechu de que la tema a tratar fuera la transexualidá nes aules, pero ye bien estrañu que se tomara esta decisión tan precipitada», reconoz.

La mesma sexóloga asegura qu’esti tipu de formaciones, qu’ufierta en centros educativos de tol país, dota a los docentes de ferramientes bien necesaries p’ayudar a alumnos en situación de transexualidá que la precisen. «Quiero dexar claro qu’en nengún casu pensaba treslladar nengún tipu d’ideoloxía, solo diba encarar una situación qu’antes taba invisibilizada nes aules. Son cuestiones que nun van dexar d’esistir y creo que ye necesariu encetales por que estos alumnos sían persones que nun sientan que les sos infancies y adolescencies son vides perdíes como asocedió hasta agora», reafita Aitzole Araneta.

Pela so parte, la conseyería d’Educación manifestó que nun se trata d’una cancelación definitiva, si non d’un aplazamientu que va durar, siquier, «hasta la publicación per parte de la Conseyería d’Educación de les directrices marco nes qu’han d’inscribise los planes de formación», espliquen dende’l CPR d’Avilés.

La cuestión que más fadió a la docente y a dellos colectivos transexuales ye que’l restu de talleres programaos nel CPR nun se suspendieron y van siguise impartiendo con normalidá. «Nun tien nengún sentíu y ye bien llamativu qu’otres formaciones con temátiques que nun tienen que ver con cuestiones rellacionaes con diversidá sexual sigan alantre a pesar de que la conseyería aliega que les directrices pa tolos cursos entá nun tán aprobaes».

Araneta considera qu’esta decisión tomóse nun momentu social bien delicáu «nel que se creó’l caldu de cultivu perfectu por que estos neños y neñes sían negaos por ciertes organizaciones polítiques o ideolóxiques». «Esta claro que si n’Asturies tuviera aprobada una llei transexual y un marcu xurídicu que garantizara los derechos del colectivu, nun se dexaría qu’estes xornaes suspendiérense de la forma en que se fixo», puntualiza la sexóloga y miembru del partíu políticu Podemos nel País Vascu.

El grupu de trabayu nel que s’enmarcaba esta sesión formativa sobro transexualidá esta coordináu pola profesora, sexóloga y presidenta de AsturSex, Ana Fernández, quien tamién manifestó públicamente’l so descontentu por esta midida tomada pola conseyería.

La conceyala d’Educación, Nuria Delmiro, reconoció que nun selo esperaba «pero cónstame que la conseyera ta bien sensibilizada col colectivu transexual y toi segura que foi una decisión que respuende a cuestiones alministratives y que podrá retomase nel so momentu», sostien la conceyala al respeutu.

Aitzole Araneta decidió nun atayar el so viaxe a Avilés. La sexóloga va participar güei nuna charra alternativa que nesta ocasión entama pola asociación local Kaleide n’El Calendoscopio de La Ferrería a les 19.30 hores.

  Categories: