Portada Educación Educación retoma la idea d’escolarizar en colexos a neños de dos años

Educación retoma la idea d’escolarizar en colexos a neños de dos años

by redacción asturnews
Genaro Alonso, Conseyeru d'Educación, Cultura y Deportes

La Conseyería d’Educación tenía yá rematáu esti vienres l’informe internu que realizó sobre’l modelu de xestión del primer ciclu d’Infantil (0 a 3 años). En dichu documentu, el departamentu de Genaro Alonso retoma la idea de «universalizar» el tramu de 2 a 3 años ya incorporar a los neños d’esta edá en colexos con espacios disponibles.

Esti proyectu d’adelantrar la escolarización, que yá foi avanzáu n’abril de 2016, va presentase agora al Conseyu de Gobiernu, la Federación Asturiana de Conceyos (FACC) y la Xunta Xeneral. Sicasí, ye una posibilidá que cobra fuerza y l’intención sería realizalo de forma esperimental mientres un periodu transitoriu.

Tres el Conseyu de Gobiernu de la selmana pasada, Genaro Alonso especificó que la intención ye aplicalo en conceyos que nun dispongan d’escueles de 0 a 3 años, unes escueles que yá esisten en 38 conceyos de la comunidá autónoma. Anovar los convenios colos conceyos, por tanto, y aplicar esta propuesta nun seríen escluyentes, dixo.

Preguntáu tamién poles condiciones nes que se pondría en marcha, señaló que «seríen análogues a les del ciclu 3-6». Esto ye, en dichu plan esperimental el serviciu sería gratuitu pa les families, al contrariu de lo qu’asocede agora na rede de 0 a 3.

Tamién te podria gustar