Portada Educación Educación retira les allabancies a Aguirre de los llibros de Primaria

Educación retira les allabancies a Aguirre de los llibros de Primaria

by redacción asturnews

El nome d’Esperanza Aguirre, del PP, va ser esaniciáu de los llibros escolares de Madrid, al da-y Cristina Cifuentes la razón a la Federación d’Asociaciones de Padres d’Alumnos Giner de los Ríos.

La federación pidiera hai un tiempu a la editorial McMillan Edelvives “ameyorar” un llibru de testu de Ciencies Sociales de Primaria qu’emponderaba la figura de la expresidenta. La Inspección Educativa acepta les quexes de los padres que tamién denunciaron que los exemplares solo mentaben a ministros del PP.

El dictame de la Conseyería d’Educación, fecháu’l pasáu 11 de noviembre cola firma del subdireutor d’Inspección Educativa, José Maximino García González, estima dalgunes de les quexes presentaes pola federación d’asociaciones de padres d’alumnos. Estos aludíen al panexíricu que se realiza de doña Esperanza Aguirre” nel testu de primaria de la editorial Mc Millan Edelvives Social Science. El llibru destacaba l’altu porcentaxe de votos qu’algamó la presidenta del PP de Madrid nes elecciones y, inclusive, el so apueste pola construcción d’hospitales y escueles dientro d’un apartáu que titula la “España de güei”.

La protesta de los padres del alumnáu de colexos públicos incidía, amás, en qu’esa redacción formaba parte del testu que tien d’aprendese [obligatoriamente], al tar enserto nun cuadru destacáu pa llograr esi propósitu”.

Dende’l 27 d’ochobre ta llista una nueva versión del llibru na que se sustituyeron les polémiques referencies a Aguirre por un apartáu sobre la Organización Mundial de la Salú. Amás, modificóse la ordenación cronolóxica de los ministros d’Educación. Según consta nel dictame del Gobiernu de Cifuentes, los equipos de profesores de los colexos públicos de Madrid van informar agora a les families que presentaron eses quexes de que tienen a la so disposición una nueva edición yá correxida.

 

Tamién te podria gustar