Educación reconoz la dificultá p’acabar el temariu y va flesibilizar la EBAU

Educación reconoz la dificultá p’acabar el temariu y va flesibilizar la EBAU
28 setiembre 08:10 2020 Imprimir

La ministra d’Educación, Isabel Celaá, anunció ayeri que la EBAU d’esti cursu va afacese a la situación escepcional, siguiendo un modelu similar al del cursu pasáu, atalantando qu’esiste’l riesgu de que tampoco esti cursu, como asocedió nel anterior, de tiempu a acabar los temarios.

Esta ye una de les midíes que s’aprobó la selmana pasada tres la xunta caltenida polos ministros d’Educación y Sanidá colos conseyeros de toles comunidaes autónomes. Na mesma llínea, tal que destacó dempués la conseyera asturiana, Carmen Suárez, van flexibilizase tamién los currículos y l’evaluación. Tamién va haber adaptaciones, como yá asocedió’l pasáu cursu, nes práctiques de Formación Profesional, col amenorgamientu de la duración de los módulos de formación en centros de trabayu (FCT) al mínimu establecíu na llei (220 hores), la integración del módulu de FCT nel módulu de proyectu nel casu de la FP Superior y la creación d’un módulu de proyectu pa integralo cola formación en centros de trabayu en Grau Mediu y la FP Básica.

Per otru llau, decidióse que les comunidaes puedan contratar como funcionarios interinos de Secundaria a persones que nun tengan el master obligatoriu hasta agora pa ser profesor d’ESO, FP, música, artes escéniques, artes plástiques y diseñu y escueles oficiales d’idiomes. Dellos territorios amosaren la so dificultá pa cubrir los puestos necesarios. Por eso, el ministeriu decidió «flexibilizar de manera escepcional y llindada hasta que concluya’l presente curso académicu, los requisitos pal exerciciu de la docencia».

Isabel Celaá y Salvador Illa analizaron coles comunidaes l’entamu del cursu y la conseyera d’Educación asturiana, Carmen Suárez destacó pela so parte la necesaria coordinación ente la so área y la de Salú, pa tener garantíes pa tornar a les aules con normalidá. Suárez destacó l’esfuerzu económicu y organizativu del Principáu y amosóse d’alcuerdu na decisión de flesibilizar determinaos aspeutos.

  Categories: