Educación propón un MIR de dos años para aportar a la docencia

Educación propón un MIR de dos años para aportar a la docencia
29 xineru 13:08 2018 Imprimir

El ministru d’Educación, Íñigo Méndez de Vigo, anunció esta fin de selmana que va proponer nel marcu del Pactu Nacional pola Educación un nuevu modelu d’accesu a la docencia qu’incluya “un programa de formación práctica tutorizada”, una suerte de MIR de dos años de duración.

Méndez de Vigo anunció esa propuesta na so intervención na Convención Nacional d’Educación que celebraba’l PP en Santiago de Compostela y que ye la primera cola que’l partíu pretende encarar un rearmamientu programáticu. Una xunta na qu’avanzó igualmente que’l presupuestu para beques va amontar en 50 millones d’euros nel proyectu de llei de Presupuestos Xenerales del Estáu para 2018. El ministru resaltó la trescendencia d’impulsar la xera del profesoráu nel Pactu Nacional pola Educación que se ta axustando nel Congresu y defendió potenciar la so formación permanente y da-y preseos para desenvolver una carrera profesional encontada nel trabayu y que pueda tar amestada a distintes posibilidaes d’especialización.

Per tollo ye polo que defendió llevar al pactu pola educación un nuevu sistema d’accesu a la función docente que sía “estable, permanente y previsible” y que tenga una carrera profesional encontada nos principios de méritu y capacidá y que tea suxeta a evaluación. Arriendes d’ello, esplicó que va proponer que para l’accesu a la docencia evalúense tantu les conocencies como les aptitúes docentes una vegada superada una fase de formación práctica.

En superando la formación inicial (Grau y Máster de profesoráu), va plantegase establecer una primer prueba selectiva qu’evalúe les conocencies de la especialidá según otros aspeutos rellacionaos cola organización curricular y escolar, la xestión de centros educativos, y l’alministración y la lexislación educativa. Va Ser, señaló, un programa de formación práctica tutorizada, una especie de MIR de dos años de duración, nel que se trabayen toes y cada una de les funciones acomuñaes a la docencia”. Al terminar esa fase de formación práctica y siempres que se llograra una evaluación positiva, va haber una segunda prueba práctica (oposición) que tendría como oxetu la comprobación de l’aptitú pedagóxica.

  Categories: