Educación plantega un rigorosu rexistru de conductes del alumnáu

by redacción asturnews | junio 25, 2019 8:29 am

La Conseyería d’Educación vieno acabante plantegar un rigorosu rexistru de conductes del alumnáu, que pue sirvir de «documentu de detección y descripción de conductes disruptivas» y va poner sobro avisu al profesoráu de cualquier situación que pueda derivar nun conflictu seriu.

La Conseyería d’Educación recueye nel documentu ‘Actuaciones pa una escuela inclusiva’ toa una serie d’iniciatives p’ameyorar la convivencia nos centros. Y, ente elles, un Rexistru de conductes del alumnáu, que va recoyer hora a hora, acaldía de la selmana, los posibles problemes de cada estudiante, dende faltes de puntualidá o asistencia hasta amenaces y coacciones, humildaciones, falsificación de documentos, daños nes instalaciones, grabación d’imaxe o soníu, agresiones, inxuries… Y asina mientres tol mes, de llunes a vienres.

El profesor tendrá d’anotar si hai un tratu incorrectu o desconsideráu escontra otros miembros de la comunidá educativa, la «faslificación o sustracción de documentos académicos», la interrupción repitida de les clases… Asina hasta 22 ítems. La vixilancia tien de llegar hasta’l recréu y, en casu de que s’anote una conducta desaveniente, tendrá de describise ónde s’atopaba l’alumnu, qué anició la situación, qué asocedió, cuál foi la conducta contraria a la norma, la reflexón sobro asoceder y les midíes impuestes.

Ye una de les munches propuestes que realizó’l denomináu Grupu Espacios, compuestu por una ventena de profesores n’activu en centros públicos, que tán trabayando col Principáu, dende va un añu, nes llínees de trabayu que tien de siguir la educación n’Asturies nel futuru. El Grupu Espacios primeru ellaboró un documentu sobro cómo teníen de ser los nuevos centros y agora presentó esti documentu sobro la escuela inclusiva, qu’Educación espera que pongan en marcha non solo los nuevos institutos, sinón cuantos centros deseyar.

L’obxetivu cimeru ye llograr la interacción de tola comunidá educativa y tener un termómetru más o menos fiable de la convivencia nel centru y, poques gracies, tomar les midíes oportunes. Pa ellaborar esi termómetru, los docentes plantegen un modelu d’encuesta a families, alumnos y profesores, que se van atopar con entrugues como ésta: «¿Qué tipu de fechos son los más frecuentes nel centru del so fíu? Les opciones son: violencia física (emburriar, pegar…); violencia verbal (faltar, metese con daquién); violencia psicolóxica (aislamientu social, refugu, chantaxe, llamátigos, rumores, amenaces); vandalismo (estroces de material, robos). De forma anónima, van contestar sobro les relaciones ente alumnos, profesores y families, y sobro comportamientos conflictivos de la clase del fíu o fía.

Source URL: http://asturnews.com/educacion-plantega-un-rigorosu-rexistru-de-conductes-del-alumnau/