Educación invierte 92.000 euros en Degaña y Blimea

La conseyería d’Educación va invertir  92.000 euros en meyores nos centros educativos de Degaña y Blimea, onde se van executar obres d’acondicionamientu nel colexu públicu El Parque de Blimea, en Samartín del Rei Aurelio, y nel colexu públicu de Zarréu, en Degaña.

Nel colexu públicu de Zarréu va actuar na cubierta, les ventanes y na meyora de l’accesibilidá al edificiu. Prevese l’arreglu puntual d’un faldón de la cubierta, y la sustitución de ventanes en zones de la planta baxa, meyores d’accesibilidá nel accesu a la parcela del centru y l’accesu al edificiu d’Infantil, amás de l’adecuación d’aseos con un bañu afechu na planta baxa del edificiu principal. Va Ser la empresa Geoser18 SL quien se faiga cargu d’estes obres, que fueron axudicaes por un importe de 32.418,35 euros. Amás, el centru cunta con un remanente de 2.929,64 euros per si surdiera dalgún imprevistu mientres les mesmes.

En Blimea contratóse d’urxencia la renovación de la sala de calderes, que s’estropió de resultes de los hinchentes del pasáu mes de xineru. Asitióse un sistema de calderes modulares n’armarios, qu’inclúi tamién salida de fumos, circuladores ya instalación eléctrica. Esta actuación cunta con un presupuestu que xube a 59.541,44 euros y encargóse a la empresa Tragsa. Según les estimaciones de la conseyería, les obres concluyiríen el próximu 15 de marzu.