Portada Educación Educación impón la xornada continua nos centros públicos ensin extraescolares

Educación impón la xornada continua nos centros públicos ensin extraescolares

by redacción asturnews

El cursu escolar va empezar en septiembre de forma presencial, pero con novedaes como la xornada continua nos centros públicos y el desenvolvimientu de l’actividá educativa ensin extraescolares polo menos nel primer trimestre del añu escolar, cuanto menos.

Habrá menos hores lectives y nun va haber extraescolares nin actividaes complementaries fora de los centros: Escursiones, visites a museos y otros equipamientos, salíes varies y actividaes similares queden enagora suspendíes. L’oxetivu de les normes que’l Principáu yá punxo por escritu y qu’agora tien d’axustar con sindicatos y directores de colexos ya institutos ye amenorgar los contactos ente grupos y con personal ayeno a los centros. Hai que compaxinar eso con una presencialidad que se considera «exa principal de l’acción docente» y daqué básicu pa «evitar l’abandonu y fracasu escolar y facilitando la conciliación de les families».

El plan de la conseyería recueye trés posibles escenarios que tuvieron de desplicase esti día. Nel primeru, caltendríase esa presencialidad. Nel segundu, un empeoramientu de la situación» llindaría les clases presenciales en dellos niveles y grupos. El terceru dibuxa’l peor de los casos, el d’un nuevu confinamientu y la vuelta a l’actividá ‘online’. Cada centru tien de tener planes de continxencia pa cada unu d’estos escenarios.

El plan que la Conseyería d’Educación ta treslladando a la comunidá educativa basase nel escenariu primeru y plantega amenorgar les ratios dende Infantil a cuartu de Primaria a 20 alumnos, con ‘grupos estables’ y llimitación del númberu de docentes que pasen per cada clase y evitando el so contactu con otros grupos. N’Infantil nun va ser necesariu’l mázcaru, pero ente primeru y cuartu de Primaria, queda a lo que determinen les autoridaes sanitaries y tocantes a ESO, Bachilleratu y FP, va ser obligatoriu si nun ye posible caltener la distancia de 1,5 metros (teniendo en cuenta que van caltener les sos ratios actuales).

Tamién te podria gustar