Educación fomenta la igualdá y avera la cultura a 700 escolinos d’Uviéu

by redacción asturnews | marzo 8, 2018 6:14 pm

La Conceyalía d’Educación d’Uviñeu vieno acabante d’entamar un aición pa fomentar la igualdá y averar la cultura a más de 700 alumnos del conceyu. El Teatru Pumarín acueye delles funciones de “+Q Muyeres”, interpretada polos usuarios del CAI Naranco pa neños de 1º y 2º de Primaria.

La Conceyalía d’Educación entama, a lo llargo de los díes 9,12 y 14 de marzu, una serie de representaciones que lleven por títulu “+Q Muyeres” y que tán destinaes a escolares de 1º y 2º d’Educación Primaria. Les funciones celebrense a les once de la mañana, nel Teatru Municipal de Pumarin, y cuerren a cargu del grupu de teatru “Entre Bambalinas”, del Centru de Sofitu a la Integración (CAI) Naranco.

“+QMujeres”, ye una pieza teatral de pequenu formatu, que combina la interpretación xestual, voz en off, danza y música y tien una duración de 40 minutos aprosimao. Con ella, pretende dase visibilidá a muyeres que fueron fundamentales na nuesa hestoria en campos como la ciencia o l’arte. A pesar de los sos llogros, lamentablemente, en munches ocasiones nun apaecen en llibros de testu. La obra amuesa tamién qu’inda hai llugares del mundu nos que los derechos de les muyeres son frayaos a diariu  y qu’entá queda enforma por faer p’algamar una sociedá igualitaria. “+QMujeres”, amás, ye una pieza didáctica pero con un enfoque risible.

L’actividá, de la mesma, sirve pa favorecer la integración de los usuarios del CAI Naranco, con proyectos interxeneracionales que-yos faen ser partes d’actividaes desenvueltes na so propia ciudá. Una manera positiva por que los estudiantes del conceyu puedan rellacionase col colectivu de persones con discapacidá y romper con clixés.

Nes funciones van participar 717 escolares de los centros educativos Amor de Dios, Juan Rodríguez Muñiz, Narciso Sánchez, Dolores Medio, Fozaneldi, Inmaculada, La Corredoria, Germán Fernández Ramos, Nazaret, Amor Misericordioso, Santu Domingo, Ventanielles, Maestru Jaime Borrás, Parque Infantil y Poeta Ángel González

Source URL: http://asturnews.com/educacion-fomenta-la-igualda-y-avera-la-cultura-a-700-escolinos-duvieu/