Educación dexa solicitar plaza nos mesmos centros con cita previa

Educación dexa solicitar plaza nos mesmos centros con cita previa, magar caltién tamién el métodu telemáticu para faer la solicitú, con un plazu que va entamar el 15 de xunu. La matriculación va aniciase’l 23 de xunetu.

Hasta hai solo unos díes, la Conseyería d’Educación caltuviera que la solicitú de plaza escolar fadríase de manera telemática, daqué que nun compartía a comunidá educativa de la concertada que tien d’esplicar a los pás que la escueyen les polémiques “aportaciones voluntaries”. Por exemplu, Escueles Católiques consideraba qu’esti métodu, centralizáu, nun garantizaba «la llibre elección de centru». La directora xeneral de Planificación ya Infraestructures Educatives, Ana Isabel López Isla, aseguró-yos, nuna xunta caltenida la selmana pasada, que se dexaría a les families presentar la solicitú de forma presencial, nos centros, pero con cita previa.

Y asina ye como vien recoyíu nel resolvimientu publicáu ayeri nel Boletín Oficial del Principáu (BOPA). Los padres van cuntar coles dos opciones. Si decantarase pola presencial, l’impresu va tar disponible nel portal Educastur, nos mesmos centros y al traviés d’una ficha de serviciu que los interesaos puen descargar, rellenar y apurrir nel colexu o institutu escoyíu en primer llugar. El centru, pela so parte, tendrá de cumplir coles midíes sanitaries establecíes (guardar la distancia física de dos metros y, si nun ye asina, usar mázcaru; entamar la circulación de persones pa garantizar esa seguridá interpersonal y midíes de separación ente la plantiya y los usuarios).

Quien s’inclinen pela vía telemática, el formulariu atopase na páxina web del Gobiernu rexonal (https://see. asturias.es) y en Educastur pal so cumplimentación y remisión a la plataforma electrónica.

El procesu oficialmente va empezar este mesmu vienres, día 22, col sortéu de los dos primeres lletres del apellíu y del sentíu (ascendente o descendente), que va dexar resolver empates de puntuación. Va Tener llugar a les 10 hores na see de la conseyería y va faese públicu en Educastur.

Los centros van publicar les places disponibles pal alumnos de nuevu ingresu o aquellos que camuden de centru’l 15 de xunu. A partir d’ese mesmu día les families van poder presentar la so solicitú. Van Tener de plazu hasta’l 19 de xunu. Dempués, el día 30, van dar a conocer les llistes provisionales de solicitúes almitíes y refugaes y, tres un periodu de tiempu pa poder alegar, el 14 de xunetu van faese públiques les llistes definitives. La matrícula del alumnáu d’Infantil, Primaria, Secundaria y primero de Bachilleratu que pase de cursu y de aquel de segundu de Bachilleratu que nun se tituló tendrá de formalizase ente’l 23 y 31 de xunetu. El restu d’estudiantes va matriculase ente’l 1 y 7 de setiembre.