Educación convoca’l mayor númberu d’interinidaes de la hestoria

La Conseyería d’Educación vieno acabante convocar 3.156 places d’interinos pa esti cursu, colo que s’algama’l mayor númberu de places convocaes de de la hestoria Cientos de docentes interinos esperaben ayeri llunes a que fueren los trés de la tarde, la hora na que se colgó n’internet la ufierta de places pal próximu cursu, distribuyíes nun documentu pdf de 134 páxines.

El Principáu saca 3.156 places pal profesoráu eventual, una cifra que, según los representantes de los y les trabayadores, ye «la mayor de la hestoria» que recuerden. Son 434 más qu’en 2017. El motivu pa Suatea, ANPE, UXT y CC OO ye la falta de cobertoria de les xubilaciones que se producieron nos últimos años. Hai centros onde los númberos salten darréu a la vista, como l’institutu de Cangas que tien 37 vacantes o tamién el de Tinéu que tien 31.

Un datu nel que, de nuevu, inciden los sindicatos son les medies xornaes, qu’anden alrodiu del millar y de les que prácticamente la metá son de Primaria. D’elles, según los cálculos de Suatea, más de 280 correspuenden a colexos públicos; 64 a Centros Rurales Arrexuntaos (CRAs) y otres 64 a CPEB (colexos d’Educación Básica qu’arrexunten enseñances d’Infantil, Primaria y Secundaria). «Les medies xornaes son ‘suma y sigue y cébense especialmente cola zona rural, colos CRAs y los CPEB», apuntó Emma Rodríguez, de Suatea. «Y escandalosa la cifra qu’hai en centros puramente d’Infantil. Ventidós de 32, el 68%. Estos datos demuestren les prioridaes de la conseyería», añedió.

Na llista de persones convocaes hai casi 12.700 interinos. El mayor númberu, 4.878 profesores, correspuende al cuerpu de Secundaria, con 292 na especialidá mayoritaria, Matemátiques. Sígen-y los maestros (4.095), nos qu’hai 855 d’Educación Primaria y 1.551 del cuerpu de técnicos de FP. L’axudicación va ser el 31 d’agostu y la segunda convocatoria, el 17 de setiembre, na que van apaecer les xubilaciones que tengan llugar a entamu de cursu y les baxes.