Educación convoca un certame artísticu y lliterariu n’asturianu pa escolinos

07 febreru 08:43 2012 Imprimir

La Conseyería d’Educación y Universidaes y el Colexu Públicu “Horacio Fernández Iguanzo” de La Foz de Morcín creen el Certame artísticu-lliterariu “Marcos Requejo” n’asturianu pa escolinos d’Educación Primaria. El concursu ta entamáu en collaboración col Conceyu de Morcín y l’Academia de la Llingua Asturiana. La organización d’esti certame tien el so orixe na necesidá de concenciar a tolos miembros de la comunidá educativa de los centros escolares de la importancia que tien la participación activa de caúna de les partes pa la puesta en práctica d’aquellos valores que refuercien el desenrrollu integral de los alumnos.

Nesti aspeutu, los centros lleven a cabu a lo llargo del cursu escolar numberoses actividaes (amagüestos, díes de convivencia, antroxos, selmanes culturales…) nes que participen familia, profesoráu ya instituciones col únicu propósitu de favorecer el desenrrollu tantu curricular como personal del alumnáu.

Esti certame súmase asina a la llista d’actividaes educatives que favorecen el compromisu de tola comunidá educativa cola formación de los más nuevos y supon un pasu más na construcción d’un futuru basáu na llibertá, el respetu y la responsabilidá.

El certame lleva’l nome de Marcos Requejo, profesor d’asturianu dende 2007 nel Colexu Públicu de La Foz de Morcín, que fai casi dos años perdió la vida en Los Picos d’Europa mientres practicaba una de les sos actividaes favorites, dir de monte.

Marcos dexó una fonda buelga en Morcín, prueba d’ello ye que l’aula d’asturianu del “Horacio Fernández Iguanzo” lleva’l so nome y entamóse un Memorial deportivu na so alcordanza. La so apasionada defensa de la llingua asturiana y el so espardimientu ente los escolinos más mozos, la so implicación col proyectu del centru y la viva participación n’actividaes estracurriculares sirven güei d’exemplu pa tola comunidá educativa asturiana.

El certame “Marcos Requejo” ta abiertu a tolos alumnos que cursen Educación Primaria n’unu de los centros educativos del Principáu d’Asturies. Tolos trabayos han tar escritos n’asturianu y cada añu’l certame va tar dedicáu a unu de los siguientes bloques temáticos: Música y cultura tradicional asturiana, salíes pela rodiada y actividaes deportives.

Nesta primer edición, los trabayos tendrán de tratar sobre dalguna de les actividaes que desenrrollen los centros educativos en rellación a la Música y la cultura tradicional asturiana” y que favorezan les rellaciones ente los miembros de la comunidá educativa.

Los escolinos de primer ciclu de Primaria van participar con un dibuxu inspiráu nuna de les actividaes referíes a la temática del concursu. Pa los escolinos del segundu ciclu’l trabayu va consistir na composición d’un microrrellatu con un máximu de 140 calteres que va poder ilustrase con dibuxos. Y los alumnos del tercer ciclu de Primaria van poder unviar un rellatu o poema d’estensión llibre y que tamién pueden ilustrar con dibuxos.

Los trabayos van poder presentase hasta’l día 29 de febreru de 2012. El Xuráu encargáu de valorar los trabayos va tar formáu por persones destacaes del mundu de la narrativa, les artes plástiques y l’educación. El Xuráu va faer públicu’l fallu’l 15 de marzu y los premios van entregase’l 28 de marzu nun actu entamáu pola Conseyería nel Colexu Públicu “Horacio Fernández Iguanzo”.

Bases completes del concursu

  Categories:
Loading Facebook Comments ...