Educación comprométese a facilitar medios dixitales pa finar el cursu

La conseyera d’Educación, Carmen Suárez, ta dispuesta a que «nengún alumnu vease perxudicáu pola situación escepcional na que tamos». Por ello, comprometióse a facilitar medios dixitales a tolos estudiantes por que puedan encarar esti insólitu final de cursu ensin perder el ritmu de trabayu, unu que torga avanzar materia salvo en segundu de Bachilleratu y siempres que pueda aportar tol alumnáu.

«Nun se trata de dar ordenadores nin wifi a tol mundu, nin d’aprovir a tol alumnáu de dispositivos que lóxicamente nun tenemos -sería invidable: hai 65.577 estudiantes n’Infantil y Primaria y 40.293 en Secundaria y Bachilleratu-, sinón que va empobinao a aquellos que tengan especiales dificultaes que los centros conocen», esclarió Sánchez. Esto ye, que l’ayuda falta de ser universal, pero sí busca garantizar qu’aquellos qu’escarezan de medios tecnolóxicos suficientes puedan siguir les clases que, por circunstancies sobreveníes, el profesoráu ta afaciendo a les aules virtuales.

Esta ye una de les cuestiones que, como reconoció la mesma conseyera, más esmolecen tantu «educativa como socialmente». Pa solucionala y faer que’l material llegue inclusive aquellos alumnos ensin accesu a internet, la Conseyería pidió a los centros qu’unvien un informe de necesidaes del so alumnáu, cuidando que se desconoz el porcentaxe de quien nun puede aportar a la enseñanza telemática. El ministeriu calcula que xube a un 10%, polo que nel casu d’Asturies seríen unos 10.587 alumnos, ensin cuntar la Formación Profesional. Sía que non, indicó la conseyera, en función d’esi censu «vamos establecer de qué manera podemos faer llegar a les families la dotación que los centros puedan emprestar, con unes condiciones razonables de bon usu y de devolución». Independientemente de les tabletas y ordenadores de que dispongan los centros, va cuntase coles mesmes con 258 conexones a internet facilitaes pol ministeriu. L’alumnáu de segundu de Bachilleratu y el d’últimu cursu de los ciclos formativos va tener prioridá.

Añedió Carmen Suárez que «sobro esto hai que tener muncha tranquilidá, muncho orde». Por ello, la entrega de los equipos va facese en coordinación colos conceyos y va correr a cargu, en dellos casos, de la Policía Local. En conceyos como Xixón o Uviéu yá s’avanzó na ellaboración de los protocolos. Mentanto, dellos centros, como ye’l casu del xixonés Miguel de Cervantes, adelantráronse y empezaron a partir tablets con ayuda de l’asociación Mar de Borrina y ayeri recibieron una donación de más dispositivos del grupu Tecles.
Ensin sustituciones

Tal que sollertaron dellos sindicatos, nun se tán llevando a cabo sustituciones del profesoráu por un problema técnicu rellacionáu cola aplicación con que se realiza’l procedimientu d’axudicación. De nun arreglase, alerta CC OO, los profesionales interinos podríen nun sumar los díes abondos a efectos del cobru del branu.