Portada Educación Educación arrenuncia a convocar anguaño les oposiciones a maestru

Educación arrenuncia a convocar anguaño les oposiciones a maestru

by redacción asturnews

Nun va haber oposiciones al cuerpu de maestros n’Asturies esti añu sigún afitara esti martes la Conseyería d’Educación del Principáu depués de dir alvirtiéndolo a lo llargo de les caberes selmanes.

El conseyeru d’Educación del Principáu yá alvirtiera de que cabía esa posibilidá al nun tar afitada la tasa de reposición. Tamién dixera Genaro Alonso que’l Gobiernu rexonal diba escosar toles víes y plazos pa intentar convocar n’Asturies unes oposiciones coles que se tenía previstu cubrir siquier 338 places. Pero, a la fin, nun va ser asina.

La convocatoria nun se va llevar a cabu anguaño y el mesmu conseyeru comunicara ayeri a directores de colexos de Primaria nuna xunta n’Uviéu, daqué que ta previstu que faiga güei colos sindicatos, convocaos poco primero de mediudía por Genaro Alonso. Pel momento, eso sí, la Conseyería d’Educación, que se diera de plazu pa tomar una decisión hasta ayeri, nun fixo oficial la so decisión.

Sicasí, tou apunta, según fontes educatives, a que l’Executivu asturianu llegó, amás, a un alcuerdu col Gobiernu cántabru, que tamién treslladó ayeri esta decisión a la so comunidá educativa, de cuenta que nenguna de los dos comunidaes autónomes lleven a la práctica la convocatoria en 2017. Tratase d’alloñar, con esti alcuerdu, un más que posible ‘efectu llamada’ nel casu de qu’una de los dos rexones sí celebrara esa ufierta pública d’empléu.

Desque’l Gobiernu central dexara nel aire la convocatoria d’estes places, cada comunidá autónoma fixo la guerra pola so cuenta. Estremadura, Castiella y Llión, Murcia, Castiella-La Mancha, Navarra, Comunidad Valenciana, La Rioxa y Aragón yá dixeron que nun va haber oposiciones. Pela contra, siguen alantre País Vascu (740 places de maestros), Andalucía (2.144 places), Baleares y Cataluña; comunidaes que van asumir el riesgu qu’esta decisión pueda implicar tres les repitíes alvertencies de los ministerios d’Educación y Facienda.

Tamién te podria gustar