Educación amplía la ufierta pública pa maestros hasta les 398 places

Educación amplía la ufierta pública pa maestros hasta les 398 places
17 avientu 08:52 2020 Imprimir

La Conseyería d’Educación amplió esta selmana la so propuesta inicial pa la ufierta pública d’empléu (OPE) d’anguaño hasta algamar les 398 places de nuevu ingresu nel cuerpu de maestros y otres 17 de promoción interna.

El director xeneral de Personal Docente, José Manuel López Guerrero, esplicó na mesa xeneral de negociación de la comunidá autónoma que se pudo ameyorar el planteamientu presentáu’l pasáu vienres al aprovechar puestos non utilizaos n’otres árees del Principáu.

La nueva propuesta surde de sumar 347 places de la tasa de reposición, 17 más dexaes pola lexislación para compensar l’altu volume de xubilaciones previstu nos próximos meses y otres 34 correspondientes al 5% de la tasa de reposición adicional non executada n’otres árees de l’Alministración. El Gobiernu d’Asturies decidió concentrar estos recursos n’Educación  coles mires d’amenorgar la tasa d’interinidá.

Les especialidaes incluyíes na OPE de 2020 son les d’Educación Infantil, Educación Primaria, Inglés, Educación Física, Música, Pedagoxía Terapéutica y Audición y Llinguaxe. El cupu reserváu para persones con discapacidá xube a 28 places. Amás, caltiénense los 17 puestos de promoción interna yá anunciaos: 10 para’l cuerpu de catedráticos de Música y Artes Escéniques y 7 para’l cuerpu d’Inspección.

La Conseyería d’Educación pretende siguir l’añu que vien cola oposición del cuerpu de Secundaria y Formación Profesional (FP) aplazada’l pasáu xunu y retardar hasta 2022 les pruebes de selección correspondientes a esta nueva ufierta d’empléu. L’Alministración preve caltener esta planificación si la situación sanitaria lo dexara.

  Categories: