Educación amonta 479 places d’oposición pa Secundaria

La Conseyería d’Educación presentó esta selmana  a los sindicatos la Ufierta Pública d’Empléu (OPE) pal Cuerpu de Secundaria con una ufierta qu’amuesa 479 places d’ingresu llibre, más 150 de promoción interna, pero ensin informar de les especialidaes a les que cinca esa ufierta.

La propuesta, sigún especificaron ANPE y UXT, supon que la tasa de reposición (sustituciones por xubilaciones) amontárase nun 10% -hasta’l 110%- «dáu l’altu númberu de xubilaciones» y anque ANPE celebró esti pasu, los dos coincidieron en qu’esta ufierta «nun resuelve’l problema de la elevada tasa d’interinidá qu’esiste na educación asturiana». «Lo necesario, lo correcto, ye suprimir la tasa de reposición y dexar que les alministraciones convoque les necesidaes reales», apuntó UXT.

Tamién coincidieron en denunciar que «la conseyería siga ensin desglosar los puestos por especialidaes», daqué qu’UXT considera «una falta de respetu a los aspirantes, que tendríen de conocer esta información pa tomar una decisión más acertada». «

N’otros sectores como’l de Sanidá o l’Alministración Xeneral sí s’ufierta. Arriendes d’ello, munchu opositores, titulares de delles especialidaes, nun saber cuál d’elles empezar a preparar o si convien-yos dise a opositar a otra comunidá autónoma porque la ufierta ye mayor, cola dificultá añedida qu’implica preparar unes oposiciones considerando les particularidaes de la especialidá y/o rexón escoyíes», alvierti ANPE.

Coles mesmes, solicitaron que nesta OPE inclúyanse les places ensin axudicar na última convocatoria, la del pasáu branu, qu’ANPE cifró en casi 80 y UXT en 73. Esti postreru fixo fincapié en que «la tasa d’interinidá ronda’l 30% y les medies xornaes suponen un terciu de too l’empléu interín. Lo que nació como daqué escepcional lleva camín de convertise en norma».