Educación afai’l calendariu escolar y retrasa’l final del cursu

La Conseyería d’Educación ta tramitando un nuevu calendariu escolar en retardando la vuelta a les aules para ver cómo evoluciona la pandemia mientres les primeres selmanes de setiembre. El nuevu calendariu va cumplir coles 175 xornaes lectives añales y establez l’entamu del cursu d’Infantil y Primaria para’l 22 de setiembre.

Nun principiu, el nuevu calendariu, que ya entamó a ser contestáu polos sindicatos, señalara que Secundaria empezaría les clases el día 28; Bachilleratu, el 29 y Formación Profesional, el 30. Sicasí, decidióse que los trés empiecen el día 28.

El cursu va concluyir el día 24 de xunu para Infantil y Primaria (en vegada del 21, como s’estableciera en xunu), ente que en Secundaria, Bachilleratu y FP el final ta previstu pal 30 (polo que camuda tamién la fecha, afitada primeramente nel día 23). El retrasu del fin de cursu nun va ser la única midida para recuperar les xornaes lectives aplazaes. Éstes tamién se van recuperar los díes 30 d’ochobre, 23 d’avientu, 8 de xineru, 15 de febreru y 5 d’abril.

Los periodos vacacionales van quedar, entós, de la siguiente manera: Navidá, del 24 d’avientu al 7 de xineru, y Selmana Santa, del 29 de marzu al 4 d’abril. L’últimu trimestre caltener ensin nenguna ponte.

Per otru llau, el departamentu de Carmen Suárez alvirtió qu’Inspección Educativa va xixilar que nun s’adelantre materia nos colexos privaos que decidan abrir les sos instalaciones antes del entamu del periodu lectivu. Según esplica, pueden abrir les sos instalaciones dende’l día 1 de setiembre, pero nun tán autorizaos a impartir clases al alumnáu. Asina lo treslladó por escritu a les respectives direcciones, nes que los indica que «el calendariu escolar ye d’obligáu cumplimientu para tolos centros educativos, sían públicos, alcordaos o privaos». Les clases van empezar y van rematar coles mesmes en toos ellos. Cuestión distinta ye que les direcciones de los centros decidan abrir les sos instalaciones díes antes del entamu del periodu lectivu, como habíen previstu y solicitáu dellos colexos.