Portada Educación Economía cotidiana y visibilización LGBTIQ, a estudiu na Universidá

Economía cotidiana y visibilización LGBTIQ, a estudiu na Universidá

by redacción asturnews
Foto: Prachatai (https://www.flickr.com/photos/prachatai/)

La Universidá d’Uviéu nun cesa nel so enfotu por tener más presencia n’Avilés al traviés de los sos cursos d’estensión universitaria y pa esti primer cuatrimestre del añu propón otros dos, que cubren dos campos de conocencia bien desemeyaes: ‘Economía de la vida cotidiana’ y ‘Overtherainbow: lo gai na música popular’.

El períodu de matriculación en dambos casos va tar abiertu del 16 al 28 de xineru con un máximu d’ochenta places a cubrir en cada unu d’ellos. L’almisión de participantes, nel casu de superase esta cifra tope, va facese por rigorosu orde de recepción. Los dos cursos son gratuitos y homologables por trés creitos de llibre configuración.

El primeru n’empezar va ser ‘Economía de la vida cotidiana’, que se va desenvolver del 2 de febreru al 6 d’abril puramente n’Avilés nel senu del Aula d’Economía. El cursu configurase nun total de diez sesiones que se van celebrar na see de La Ferrería n’horariu de 19 a 21 hores. Van tratase temes bien diverses, dende la viabilidá futura del actual sistema de pensiones hasta’l problema del desempléu xuvenil. Tamién habrá cabida pa cuestiones rellacionaes col mercáu del arte o la perspectiva del xéneru nel negociu del cine.

Nel so casu, ‘Overtherainbow: lo gai na música popular’ va tener llugar del 15 de febreru al 26 d’abril y va desenvolvese igualmente en diez sesiones de media hora más de duración. Esti cursu tien como oxetivu «visibilizar la variedá artística, estilística y discursiva que la comunidá LGBTIQ utilizó pa espresase al traviés de la música». De la mesma forma, tamién se van analizar los estereotipos que la sociedá a constrúi en redol a determinaos repertorios.

Tamién te podria gustar