Duque quier una llei d’universidaes basada en «la calidá y la equidá»

Duque quier una llei d’universidaes basada en «la calidá y la equidá»
31 xunetu 13:20 2018 Imprimir

El ministru de Ciencia, Innovación y Universidaes, Pedro Duque, presidió esta selmana la Conferencia Xeneral de Política Universitaria -a la que tamién allegó’l conseyeru d’Educación asturianu, Genaro Alonso-, na que treslladó a toles comunidaes autónomes la so intención d’apautar una nueva llei d’universidaes «más positiva pal país» y que tea basada en «la calidá y la equidad».

Duque, que quier tener consensuada esa llei  primero qu’acabe la llexislatura, reconoció la dificultá que supon, pero na xunta d’ayeri decidióse qu’a partir de setiembre crearánse grupos de trabayu que van encetar non solo la nueva llei, sinón tamién l’estatutu del personal docente ya investigador, y les pruebes d’accesu a la universidá.

El ministru tamién s’amosó dispuestu a consiguir reformes «más apremiantes», sobremanera aquelles tendentes a dar mayor estabilidá a la carrera profesional de les universidaes y frenar l’avieyamientu de les plantiyes.

Los conseyeros de comunidaes gobernaes pol PP ven «difícil» que l’Executivu de Pedro Sánchez llogre sacar alantre estes reformes por cuenta de «la so exigua minoría parlamentaria», pero consideren que «tien bastante racionalidá». Otres formaciones polítiques ven el planteamientu presentáu por Pedro Duque «quiciabes, descomanadamente pretencioso», precisamente por esa debilidá política» del PSOE. Asina lo indicaron los conseyeros de Madrid y La Rioxa.

El ministru tamién punxo sobre la mesa la necesidá de camudar el modelu de les beques universitaries y d’ameyorar el so financiamientu,  coles mires d’aumentar el númberu de becaos y les cuantíes que reciben. Sofitar la internacionalización de les universidaes españoles ye otra de les prioridaes de Pedro Duque pa los próximos meses.

  Categories: