Dos rapazos burllen la seguridá del Coliséu y grábense esguilándolu

03 agostu 09:57 2016 Imprimir

Dos guah.es burllaron los sistemes de vixilancia del Coliséu de Roma y llograron aportar al so interior y esguilar poles sos parés hasta algamar la so parte más alta, unos fechos que grabaron y darréu publicaron n’internet.

El vídeu foi espublizáu pelos medios italianos dempués de qu’apaeciera publicáu na canal de YouTube del colectivu Visual Enemies, del que forma parte’l supuestu autor de l’acción, el youtuber alemán Flavius Vasily. “Dames y caballeros, presentámosvos con arguyu’l nuesu nuevu vídeu dende’l Coliséu de Roma, n’Italia. Mira y espubliza la palabra”, convida Visual Enemies, que cunta con otros documentos sobre esguilaes d’edificios en Berlín o Colonia.

Na grabación de Roma, l’autor amuesa’l percorríu que fixo dende una estación del metro hasta los altores del propiu Anfiteatru Flavio, emblema de la capital italiana. El vídeu cunta con una cuidada estética audiovisual y ufierta unes impresionantes imaxes nocherniegues dende lo alto del Coliséu, tantu del so interior como del área que la arrodia. Desconozse enagora cuándo se producieron estos fechos y munchos son yá los que llamenten la falta de seguridá nel edificiu, al que los mozos aportaron con aparente facilidá.

La cuestión del nivel de vixilancia del patrimoniu italianu yá centró l’alderique públicu la selmana pasada, dempués de qu’un turista estadounidense pasara la nueche del 25 al 26 de xunetu solu nel techu del Duomo de Milán, nel norte d’Italia. Atopáu la mañana siguiente polos guardias de seguridá, el mozu acotó que cerraren los accesos que dan al techu con él dientro y que decidiera permanecer solu y en silenciu sobre’l templu pa nun amenar alarmes de nengún tipu.

  Categories: