Dos de cada tres xixoneses demanden la oficialidá según la encuesta de Llera Ramo

La primer encuesta sociollingüística municipal de Xixón amuesa datos perfavorables a la normalización del asturianu en tolos ámbitos de la vida pública. Nel estudiu del profesor Francisco Llera Ramo -que se presentó esti llunes 9 en formatu de llibru- dos de cada tres xixoneses manifiéstense partidarios de la oficialidá, más d’un ochenta por cientu afirmen entender la llingua asturiana y una amplia mayoría demanda el so empléu polos políticos y l’aumentu de les midíes de promoción.

El caderalgu de Ciencies Polítiques de la Universidá del País Vascu presentó l’estudiu que firma xunto a Pablo San Martín y el restu del equipu Euskobarometro que “la realidá de Xixón ye un reflexu de la d’Asturies” y que “nun son los ciudadanos los que ven un problema nel asuntu llingüísticu sinón les élites y los políticos, dellos de los cualos carecen una mestura d’alerxa y de neurosis énte l’asturianu”, afirmó’l profesor Llera.

L’autor de la Primer Encuesta Sociollingüística Municipal de Xixón y d’anteriores estudios d’ámbitu autonómicu destacó la paradoxa de qu’Asturies “ye la comunidá na que hai más información sobre la realidá llingüística y la única onde los ciudadanos siguen sin ver reconocíos los sos derechos constitucionales nesa materia”. Llera responsabilizó a los políticos de la situación y tuvo guiños hacia los responsables asturianos del partíu onde milita na federación del País Vascu: “nun entiendo qu’un socialista pueda negase en redondo a reconocer derechos ciudadanos tan elementales como son los llingüísticos y menos cuando s’argumenta alrodiu del costu económicu d’esa reconocencia”, afirmó pa preguntase en voz alta: “¡dende cuando se puede falar de costu económicu en tratándose de derechos!”. Pa Llera los políticos asturianos “amás de gobernar tienen el deber de facer pedagoxía social” y por eso dixo “tan obligaos a reconocer los derechos llingüísticos de los asturianos cola oficialidá y a facer un llabor intensu de normalización social”.

El caderalgu de la Universidá del País Vascu reivindicó el factor llingüísticu como “elementu fundamental pa recuperar l’autoestima de los propios asturianos” y p’activar “l’enorme potencial cultural de la nuestra comunidá”. N’otru sen l’autor del estudiu sociollingüísticu quiso resaltar que de los datos obteníos na so encuesta como nos de los anteriores trabayos fechos sobre esti asuntu “hai perbones condiciones pa entamar polítiques normalizadores como reflexen les actitúes positives de los ciudadanos hacia esta posibilidá y el so mesmu grau de conocencia activa o pasiva de la llingua” y arriendes d’ello consideró necesario “entamar l’alfabetización d’adultos, amás de la escolarización”, porque, según dixo “ye l’entornu familiar el que garantiza la cadena de tresmisión llingüística y el que-y da’l conteníu emocional a les llingües, porque una llingua ye emoción énte too”.