‘Doctor Strange nel multiversu de la llocura’ aporta a los cines

La nueva película de Sam Raimi del universu Marvel ‘Doctor Strange nel multiversu de la llocura’ aporta a los cines depués de meses d’espera.

Dende la so revolucionaria Evil dead, realizada en 1981 con lo suelto del bolsu como presupuestu, Sam Raimi foi progresivamente esguilando prestíu nel senu de la industria (Darkman o’l western casi vanguardista Rápida y mortal yá teníen detrás una respetable infraestructura) hasta algamar la gloria, ente 2002 y 2007, cola arrogante triloxía de Spider-man. Dempués siguió trabayando (más como productor que como director), pero ensin apurrir nengún títulu relevante al so filmografía, anque la sarcástica Abasnar al infiernu yera francamente graciosa.

Por eso, y pol apreciu que-y tenemos poles munches hores de felicidá que nos regaló, yera alentador saber que’l tíu Sam volvía, pela puerta grande, a la galaxa Marvel cola segunda epopeya consagrada al carismáticu doctor Strange. Daqué, sicasí, esmolecíanos: dende 2007 llovió enforma y, güei, los incondicionales del cine de superhéroes tán acostumaos a consumir otres formes, otres testures y otros ritmos, bien distintos a los del home gatuña raimiano, inda contaminaos por una narración llimpia, de fonduxe clásicu, más próxima a una comedia de Blake Edwards qu’a los blockbusters de Scott Derrickson, Taika Waititi o los hermanos Russo.

Con éses, como yera de tarrecer, Raimi venció a la parafernalia visual de los nuesos díes con un caudal inclemente de círculos, boles o llátigos de fueu en casi toles escenes d’acción y un abusu de diálogos anestesiantes en redol a les temes de les realidaes (o irrealidaes) paraleles, los múltiples universos y los sos múltiples Otros Yo (de Strange o de Wanda, agora madre bona, agora malvada Bruxa Escarlata), etcétera. Escesu d’equipaxe que solo va seducir a los bien marvelianos, a quien amás se gasaya con jugosas apaiciones estelares.