Dixebra presenta n’Uviéu nuevu discu’l 28 d’avientu

by redacción asturnews | diciembre 18, 2018 2:28 pm

La banda decana del rock n’asturianu, Dixebra, va presentar esti próximu vienres 28 d’avientu na uvieina Sala Tribeca el so nuevu discu ‘Uviéu 17-9-2017′, que la selmana pasada entro na llista de los 100 más vendíos en tol Estáu sigún fizo saber la mesma banda esti día.

El discu que va presentar Dixebra nestos caberos díes del añu ye la grabación del conciertu que la formación avilesina ufiertó na Plaza La Catedral d’Uviéu en septiembre del 2017, onde collaboraron dellos de los músicos más reconocíos del panorama musical asturianu.

Tratase de la repetición de la so actuación nel Festival Intercélticu de Lorient del mes d’agostu del 2016, nel que participaron distintos músicos asturianos como José Manuel Texedor, a la gaita, y Javier Texedor, al acordión, Rubén Bada (violín y buzuqui), Ángel Ruiz (banjo), Toño Gómez (trombón) y Maxi Compán (voz de Fe d’aguarones). Naquel conciertu sonaron los sos temás más clásicos -‘Asturalia’, ‘Tida Nemesia’, ‘Indios’ y ‘Nun llores’, por citar dalgunos-, anque afechos a la so nueva forma de faer les coses.

Esti va ser el discu númberu 13 d’esta banda de rock, pioneros del rock y el ska en llingua asturiana. Con esti trabayu entraron directamente nes llistes d’ésitos gracies a les vientes físiques nes principales tiendes d’Asturies y al traviés de la tienda online musicasturiana.com.

Source URL: http://asturnews.com/dixebra-presenta-nuvieu-nuevu-discul-28-davientu/