Dixebra entama la Xira-Tour 87-17

Dixebra entama la Xira-Tour 87-17
15 febreru 15:28 2017 Imprimir

La formación avilesina Dixebra va escomenzar esti próximu sábadu la xira conmemorativa del so trenta aniversariu, a la que denominaron Tour 87-17, nel pueblu de Valles, nel conceyu de Piloña.

El llugar escoyíu ye Valles, nel conceyu de Piloña, onde l’Asociación Músico-Cultural Pepe Bocanegra tien la sede y desenvuelve les sos actividaes. Esta entidá creóse nel añu 2008 y dende entós vieno entamando regularmente bien de conciertos de tou tipu, convirtiéndose nuna verdadera dinamizadora del panorama musical n’Asturies.

Dixebra quier, al escoyer Valles pa inaugurar la xira, amosar el so apoyu y almiración pol llabor d’esta asociación, que tien una de les meyores programaciones musicales del país, al mesmu nivel o superior que munches de les organizaes por estamentos oficiales. Amás, la presencia avezada de bandes asturianes fai d’ella un escaparate del bayurosu movimientu musical d’esta tierra. Ésta va ser la segunda ocasión na que van xubir al escenariu asitiáu nesti pequeñu pueblu, la primera foi nel añu 2012 nel programa «Alcuentros de Músiques feches n’Asturies» y daquella la respuesta del públicu foi inmeyorable, dalgo que cuenten repetir nesta ocasión. Otru de los factores que llevaron a Dixebra a tomar esta decisión foi’l deséu de, en cierta manera, volver a los oríxenes de la banda, cuando actuaben en locales reducíos, onde’l contactu ente músicos y espectadores ye muncho más estrechu y directu.

La xira Tour 87-17, que tovía nun ta zarrada del too, va llevalos a tocar per bona parte de la xeografía asturiana (Piloña, Llanera, Xixón, Uviéu, Ribeseya, L.lena, Mieres, Llangréu, Siero, Llanes…) y de fuera d’ella. El repertoriu escoyíu pa la mesma va ser un repasu polos cantares compuestos nestes tres décadas d’actividá ininterrumpida. Ésta ye una más de les actividaes que tienen pensao entamar a lo llargo del añu pa festexar esti tiempu de música y compromisu, ente les que destaquen el proyectu «Dalgo vieyo, dalgo nuevo, dalgo emprestao», cola grabación de tres temes y los sos correspondientes vídeo-clips.

  Article "tagged" as:
  Categories:
Loading Facebook Comments ...