Discutiniu polos mensaxes sectarios nun cómic de Marvel

Discutiniu polos mensaxes sectarios nun cómic de Marvel
14 abril 08:57 2017 Imprimir

El dibuxante musulmán indonesiu Ardian Syaf esculpóse esti martes nes redes sociales n’introduciendo mensaxes consideraos críticos col xudaísmu y el cristianismu nel primer númberu del cómic X-Men Gold de la editorial Marvel.

“La mio carrera ta acabada agora. Ye la consecuencia de lo que fixi y asumolo. Por favor, non más burlla, non más odiu. Espero que too tea en paz”, escribió n’inglés Syaf nun mensaxe en Facebook al que reaccionaron más de 3.900 usuarios. “Les mios sides por tol ruiu. Adiós, que Divos bendígavos. Ámovos a toos”, amestó’l dibuxante, que los sos dibuxos tamién fueren entendíos como un ataque contra’l gobernador de Yakarta, el cristianu Basuki Tjahaja Purnama, más conocíu como Ahok.

El cómic X-Men Gold rellata les peripecies de la nueva xeneración de mutantes con superpoderes conocíos como los X-Men. Nuna de les viñetes del primer númberu, llanzáu’l pasáu miércoles, Syaf dibuxa a unu de los personaxes, la mutante xudía Kitty Pryde, tapando parcialmente’l lletreru d’una xoyería (“jewellery” n’inglés) de forma que destaca “jew”, o xudía.

Na mesma viñeta, lleese nun edificiu’l númberu 212, en referencia supuestamente a la fecha d’una protesta de musulmanes contra Ahok, quien ta acusáu de blasfemia, el pasáu 12 d’avientu na capital indonesia. Amás, unu de los personaxes del cómic, Colossus, lleva una camiseta inscrita con “QS 5:51″, que fai referencia a un versículu del Corán que, según una interpretación radical, prohibe a los musulmanes escoyer a un líder cristianu o xudíu.

El pasáu sábadu, Marvel emitió un comunicáu nel qu’anunció que los mensaxes fueren introducíos ensin la so conocencia y que, amás de retirar los númberos en papel y les versiones dixitales, va tomar una “midida disciplinaria”, que nun precisó. Los polémicos mensaxes, según la editorial, “tán en directa oposición cola integración que defende Marvel Comics y lo que los X-Men defendieron dende la so creación”.

  Categories: