Discursu de la Manifestación pola Oficialidá – Mayu 2007

06 mayu 23:21 2007 Imprimir

Hai venti años, en mayu de 1987, la Xunta pola Defensa de la Llingua Asturiana convocaba una concentración nel Paseu los Álamos pa pidir una reforma del estatutu d’autonomía que reconociera la oficialidá del asturianu. Aquella concentración acabó en manifestación. D’entós p’acá, añu tres añu, la Xunta vieno llamando a manifestase nesta xornada de reivindicación de los nuesos derechos. Pasaron venti años y equí siguimos col mesmu convencimientu.
Nun somos los mesmos: Asturies cambió y l’apreciu pol nuesu patrimoniu llingüísticu aumentó. Ye verdá que’l procesu de sustitución llingüística nun se tornó y que la mocedá fala cada vez más castellano, pero tamien ye verdá que, a cada vuelta, más xente mozo s’interesa por recuperar la llingua de los sos mayores. Esta manifestación ye una señal más de qu’hai un movimientu social ampliu n’Asturies que nun se da, que nun renuncia a caltener viva la so llingua, que sigue lluchando polos sos derechos.
Habrálu que piense que venti años son munchos pa siguir reclamando la oficialidá. Pero los derechos nun caduquen: nin se miden en tiempu nin en porcentaxes de población. Que naide se llame demócrata si piensa que nesti problema de falta de derechos podemos conformanos con migayes.
Equí tamos pa pidir derechos mientres dellos siguen col cantar de la imposición. ¿Fai falta recordar quien sufre la imposición? Vamos repasar namás esti añu.
Un doctorando de la Universidá d’Uvieu quier inscribir la so tesis y na Universidá refúguen-ylo porque nun acepten nada que venga n’asturianu. ¿Ye’l doctorando’l que quier imponer l’asturianu o ye la Universidá la que-y quier imponer otra llingua?
Un funcionariu autonómicu de los Servicios Xurídicos del Principáu cubre n’asturianu un impresu pa notificar al so departamentu una operación quirúrxica. Los sos superiores nun-y lu acepten y esíxen-y que nel futuru nun vuelva a usar más que’l castellanu. ¿Ye’l funcionariu’l que quier imponer l’asturianu o son los sos xefes los que-y quieren imponer otra llingua?
Un maestru itinerante manda a la Conseyería d’Educación los xustificantes de los sos recorríos y failo n’asturianu. Vuelven-ylos con tachadures y piden que los presente nel impresu oficial, que ta en castellanu. ¿Ye’l maestru’l que quier imponer l’asturianu o ye la Conseyería la que quier impone-y otra llingua?
Tres exemplos son abondos pa dexar n’evidencia que’l cantar de la imposición del asturianu yá repuna. Que nun quieran facenos fatos, que nun insulten la nuesa intelixencia. Naide quier imponer l’asturianu. Los únicos que sufrimos la imposición somos los que queremos usalo y la llei nun nos lo reconoz. Y n’Estáu español namás hai una vía xurídica efectiva pa garantizar la normalización de les llingües minorizaes: faceles oficiales.
Llevamos venti años de reivindicación y nesos años PSOE y PP siempre foron de la mano nos determinos importantes sobre la llingua. Pel llau del Partíu Popular últimamente tán dándose pasos positivos con declaraciones a favor del asturianu, usándolo públicamente y abriendose al diálogu. Son pasos interesantes, pero eso nun ye abondo. Bones palabres y promoción, muncha promoción, yá lo tenemos dende va decades col Partíu Socialista. El problema ye que la realidá ye mui testerona y, depues de venti años de promoción, la llingua sigue perdiendose y falándose cada vez por menos xente. Polo tanto, hai que-yos lo volver a dicir a los cabezaleros de la Federación Socialista Asturiana: nun nos tomen por fatos. Nun nos vengan con xuegos malabares, nun quieran dar la vuelta a les palabres, nun nos falen de llegar hasta’l tope de la oficialidá…, pero ensin oficialidá. Eso ye tanto como dicir que tán a favor de la igualdá ente homes y muyeres…, pero ensin llegar a la igualdá real. O hai igualdá o nun la hai. O hai derechos llingüísticos –quier dicise, o hai oficialidá–, o nun los hai, que ye lo que pasa agora. Les bones palabres danse de focicos cola realidá llegal y ehí tán los casos qu’acabamos de comentar pa demostralo. Nun se pue dicir que tán a favor de que nun se discrimine a naide y a la vez tar en contra de dar derechos.
Dígannos lo que piensen de verdá. Polo menos, anque fore menos políticamente correcto sería más coherente cola política que faen: qu’esto del asturianu nun paga’l tiru, que ye una aldeanada, que nun ye una llingua como la de los sos compañeros socialistes de Cataluña, Galicia, Valencia o País Vascu. Que lo digan d’una vez y que dexen d’adornalo con esos cucurrabucos dialecticos que nun engañen a naide. Si nun hai derechos llingüísticos, la llingua, namás con bones palabres, nun se caltien.
Nestos venti años, ente otros avances, el movimientu de reivindicación llingüística vio cómo s’axuntaba a les sos files Izquierda Xunida gracies al llabor dientro d’ella de xente favorable al asturianu. Na anterior reforma del estatutu la falta d’oficialidá foi un elementu que decidió’l so votu negativu, lo mesmo que fexo daquella’l Partíu Asturianista.
Depues de les elecciones autonómiques d’esti mes de mayu va entamase un procesu de reforma estatutaria del que tien que salir la oficialidá. Ente los munchos resultaos que puen dase nes elecciones, hai ún posible: que los partíos mayoritarios precisen l’apoyu de dalgún d’estos partíos favorables a la oficialidá. Y paeznos un bon momentu pa facer dos preguntes en voz alta:
Primero: ¿el de la oficialidá ye un asuntu tan importante pa ellos como pa condicionar un pactu de gobiernu?
Segundo: Nel casu de que’l partíu mayoritariu nun acepte la oficialidá n’Estatutu, ¿van romper esi pactu?
Ensin facer de menos otros asuntos tamien importantes, ta claro que pa nós, nesti momentu políticu, hai que responder que sí n’entrambos casos. Uno, porque nun tenemos tol tiempu del mundu y tolos indicadores sociolóxicos indiquen que la perda de falantes d’asturianu ye rapidísima. Y otro, porque ye un asuntu de derechos: nun se pue sofitar un gobiernu que quiera torgar esos derechos a los ciudadanos.
De toles maneres queremos dexar clara una idea: esta llexislatura tien que ser la de la oficialidá. Los partíos, toos, tienen que tar a l’altura de les circunstancies y pa facer llegar esi mensaxe de consensu alredor de la cuestión llingüística llevamos trabayando dende hai bien de tiempu. Yá ye hora de poner les bases pa que’l patrimoniu llingüísticu asturianu pueda siguir vivu con una marcación llegal y unes polítiques de normalización como les de cualquier otra llingua del Estáu español. Gane un partíu o otru, fáiganse los alcuerdos que se faigan, digan lo que digan nos sos programes, refórmese l’estatutu nun sen o n’otru… n’Asturies hai un movimientu de reivindicación llingüísticu vivu, hai conciencia, tenemos la razón de la nuestra parte y vamos siguir lluchando polo que nos pertenez, por una Asturies onde a nadie lu puedan discriminar por falar la llingua que falaben los sos güelos. Y anguaño eso ta pasando. Mientres eso siga siendo una realidá necia, pa vergüenza de los que se dicen demócrates, vamos siguir lluchando y pidiendo la oficialidá.

  Categories:
Loading Facebook Comments ...