Portada Cine Directores como Tarantino, Soderbergh, Polanski o Almodóvar compiten col cine de superhéroes y series interminables

Directores como Tarantino, Soderbergh, Polanski o Almodóvar compiten col cine de superhéroes y series interminables

by redacción asturnews

Les grandes productores de Hollywood reinciden anguaño hasta l’enfastiu nos sos superhéroes, remortines y versiones d’aquelles historietes que nun-yos fallen en taquilla, pero tamién hai directores como Tarantino, Soderbergh, Polanski o Almodóvar qu’esti añu van competir col cine de superhéroes y les series interminables.

Los Vengadores, X-Men, Terminator, Toy Story, Men in Black, Godzilla… La cantidá d’enésimes partes de productos d’ésitu resulta estraordinaria. La otra cara de la industria pónenla directores igualmente conocíos pero con propuestes en principiu menos previsibles y más suxerentes. Martin Scorsese, Roman Polanski, Quentin Tarantino, Lars von Trier, Steven Soderbergh y Clint Eastwood son dalgunos de los grandes qu’estrenen nel 2019. Na cuota española destaquen les propuestes d’Isabel Coixet, Pedro Almodóvar y Alejandro Amenábar.

Los grandes episodios de la hestoria,  cuantimás aquellos que dexen marxes amplios a la interpretación o la perspectiva del narrador, son un filón seguro pa quien dispón de la solvencia y los medios necesarios para faelo. La mafia ye unu de les temes recurrentes de Martin Scorsese, qu’esta vegada afitase nel asesín múltiple Frank Sheeran y la so víctima más pernomada, Jimmy Hoffa. Ye The irishman, protagonizada por Robert de Niro, Al Pacino y Joe Pesci. Na mesma sienda histórica pero con un rexistru bien distintu, Polanski preve esponer la so visión del casu Dreyfus nun filme que rescata’l célebre títulu del artículu de Émile Zola al respeutu, Yo acuso.

Otra de les cintes más esperaes del añu ye Once upon a time in Hollywood (Érase una vegada en Ho­llywood), na que Quentin Tarantino cunta con Leonardo DiCaprio y Brad Pitt pa entecruzar la hestoria d’un actor y el so doble cola del horrible asesinatu de l’actriz y modelu Sharon Tate, la esposa de Polanski, nel branu de 1969. Tratar d’una ficción rellacionada con un fechu real mientres una dómina de grandes cambeos: la mesma que Von Trier escueye pa la so próxima película-prevocación, La casa de Jack, onde Matt Dillon encarna a un asesín en serie que defende’l supuestu calter artísticu de los sos crímenes. Bruno Ganz y Uma Thurman arriquecen el nada modestu cartelu.

 

Tamién te podria gustar