Denúnciense retrasos na asignación de refuerzos pa alumnos de necesidaes especiales

Denúnciense retrasos na asignación de refuerzos pa alumnos de necesidaes especiales
24 xineru 10:10 2020 Imprimir

El segundu trimestre del cursu empezó ensin que dellos centros alcordaos de la rexón tengan entá confirmación oficial del personal y horarios destinaos pa los alumnos con Necesidaes Educatives Especiales (NEE), lo que vieno acabante ser denunciao polos centros educativos. El casu nun ye esclusivu d’estos centros ya que dellos de la rede pública vienen faciendo la mesma quexa dende l’entamu del cursu.

La situación creó «malestar» nos centros, tal que treslladó esta selmana’l presidente d’Escueles Católiques d’Asturies, Simón Cortina, a los directores xenerales d’Evaluación y Equidad Educativa, Paula García, y de Planificación ya Infraestructures Educatives, Ana Isabel López Isla. Cortina esplicó tres l’alcuentru qu’ésti se debía al compromisu adquiríu va unos meses cola mesma conseyera pa caltener abiertu en tou momentu «el diálogu». Por eso, Escueles Católiques solicitó la xunta.

La cuestión ye que nun foi hasta avientu cuando Educación treslladó a los colexos alcordaos la asignación de recursos pa los alumnos con NEE. Los centros que presentaron entós allegamientos nun llograron entá respuesta. Según Cortina, el directores xenerales «almitieron los retrasos y comprometiéronse a que nun vuelva asoceder». Aprovechando la ocasión, Escueles Católiques anunció que creó un grupu de trabayu pa plantegar cambeos na fórmula qu’aplica la conseyería p’asignar estos recursos, qu’hasta agora se basen namá nel númberu d’alumnos con NEE. Los alcordaos pretenden que se garantice una «mínima estabilidá».

  Categories: