Denuncien que la Conseyería d’Educación va recortar el 75% de les hores de Llingua Asturiana en Bachilleratu

17 marzu 08:45 2015 Imprimir

Iniciativa pol Asturianu vieno acabante denunciar nuna nota de prensa asoleyada esti día la intención de la Conseyería d’Educación de recortar el 75% de les hores de Llingua Asturiana en Bachilleratu. La organización ve nesta decisión la verdadera cara de la Conseyera Ana González, que siempres echa la culpa a otros de los problemes del asturianu eludiendo la so responsabilidá directa.

Iniciativa pol Asturianu denuncia la situación que-y espera a l’asignatura de Llingua Asturiana en Bachilleratu de confirmase los planes de la Conseyera d’Educación del Gobiernu d’Asturies, Ana González, y que pudieron sabese estos díes pol borrador del currículu unviáu a los centros educativos asturianos. Nel borrador la Conseyera González vuelve usar la LOMCE “pa escudase y atacar a la llingua asturiana, recortando 3 de les 4 hores selmanales que tien l’asignatura optativa” sigún l’asociación.

Pa Iniciativa pol Asturianu “esta decisión ye llamentable y un ataque directu al nivel educativu nel que l’asignatura tien una situación más feble, pues ye en Bachilleratu onde hai un menor porcentaxe de matriculación, frutu de les polítiques d’Educación n’Asturies, qu’eviten que l’asignatura pueda ser materia evaluable na PAU, faciendo que munchos alumnos prefiera optar por otres materies que sí-yos puntúen p’acceder a places universitaries”.

Darréu d’ello, n’Iniciativa desixen a la Conseyera que retire “de manera inmediata esti borrador de currículu y que dexe a l’asignatura de Llingua Asturiana pelo menos nes mesmes condiciones (yá negatives) que tenía hasta agora en Bachilleratu. De nuevo l’asignatura tendrá que competir con otres llingües estranxeres y con Relixón, nuna situación inxusta y absurda. La Conseyera dicía va poco tar esforzándose por consiguir la especialidá docente pal profesoráu d’asturianu. Agora vemos cuáles son les sos verdaderes intenciones”.

La mentada situación vienen denunciándola organismos internacionales como’l Conseyu d’Europa o la UNESCO y ye la que ta llevando a la llingua asturiana a la marxinalidá y la desapaición y dende Iniciativa pol Asturianu desixen-y a la Conseyera Ana González “que dea esplicaciones y nun recorte todavía más la presencia del asturianu en Bachilleratu, pa lo que-y fadremos llegar un entruga que s’entregará nel Rexistru del Gobiernu d’Asturies”.

  Categories:
Loading Facebook Comments ...