Portada Hestoria Dellos colectivos reclamen la torna de los documentos asturianos que tán nel Archivu de Salamanca

Dellos colectivos reclamen la torna de los documentos asturianos que tán nel Archivu de Salamanca

by asturnet

Una rueda de prensa que va celebrase esta tarde en Xixón, va reclamar énte la sociedá la necesidá de que la documentación asturiana que permanez nel Archivu de Salamanca “tien de ser devuelta y tar archivada n’Asturies, a disposición de los hestoriadores y de los actores socio-culturales del País”. La iniciativa ponla en marcha l’asociación cultural N’Ast, que va xuntar a dellos organizaciones, colectivos, asociaciones y entidaes na vindicación de que tola documentación asturiana espoliada na guerra civil torne al país.

El manifiestu ye’l siguiente:

Manifiesu pola documentación hestórica asturiana espoliada

Con motivu de la noticia de la reivindicación catalana sobre los fondos documentales del tiempu de la Guerra Civil que, espoliados pola dictadura franquista nel so momentu al Centru Asturianu de Barcelona, anguaño alcontrábense archivaos nel Centru Documental de la Memoria Hestórica de Salamanca, dellos coleutivos, asociaciones y entidaes queremos comunicar lo viniente:

1) Que si bien ye lexitimu que’l Gobiernu de Cataluña y determinaos actores sociales d’esi territoriu quieran recuperar tola documentación qu’afecta a la memoria hestórica del pueblu catalán, nun ye almitible qu’aprovechando la falta de compromisu cola hestoria propia de los Gobiernos autonómicos del PSOE n’Asturies agora quieran apoderase d’unos fondos que son hestoria viva d’otru pueblu: l’asturianu.

2) Los fondos afectaos concretamente contienen tola documentación (llibros, fiches personales, espedientes, recibos de pagu, documentación de militantes y pertenecientes a partíos políticos y sindicatos) que dempués de la cayida del frente del Norte na Guerra Civil foi treslladada dende Asturies hasta Cataluña p’atopar acomodu nel Centru Asturianu de Barcelona. De fechu ente los años 1937 y 1939 el Centru Asturianu de Barcelona nun foi un simple centru d’emigrantes asturianos sinón que yera la institución que vertebraba tola población asturiana exiliada.

3) Yá nel añu 2008 la direición del Archivu Hestóricu d’Asturies sollertó a la Conseyería de Cultura de la posibilidá de qu’ente los fondos de Salamanca devueltos daquella a la Generalitat de Cataluña yá figuraren documentos prindaos en Barcelona pero pertenecientes al patrimoniu documental asturianu. Colo cual la situación actual amuesa bien cual ye l’interés del PSOE na hestoria d’Asturies.

4) Toa esta documentación forma parte de la memoria del pueblu asturianu, teniendo amás un valor cultural incalculable, y polo tanto tien de ser devuelta y tar archivada n’Asturies, a disposición de los hestoriadores y de los actores socio-culturales del País.

5) Igualmente queremos reclamar pa la sociedá asturiana hasta’l caberu documentu de procedencia asturiana qu’esista nel Centru Documental de la Memoria Hestórica de Salamanca. Concretamente los fondos espoliados illegalmente n’Asturies impliquen unes 700 caxes de documentación. Y nun se trata namás de documentación del Conseyu Soberanu o de les organizaciones de la dómina de la Guerra Civil sinón que tán incluyíos archivos del entamu del sieglu XX.

6) Tamién queremos denunciar que munchos d’estos documentos alcuéntrense en Salamanca tovía ensin microfilmar (archivu gráficu y prensa, especialmente), que dellos tan en mal estáu de caltenimientu, y que gran parte de les copies microfilmaes son d’escasa o nula calidá.

Tamién te podria gustar