Dellos cientos d’asturianos aconceyáronse na Escandalera pa siguir la clas d’asturianu de la Xunta

La Xunta pola Defensa de la Llingua dió esti sábadu 16 de Febreru a les 13 hores una clas n’asturianu na Plaza La Escandalera d’Uviéu. Con esta inciativa al aire llibre, la Xunta quier denunciar les munches irregularidaes que se tan cometiendo por parte del executivu del Principáu cola enseñanza de la llingua na rede educativa d’Asturies. La Xunta reclamaba asina al gobiernu midíes coherentes pa que se cumplan les lleis y normatives vixentes.

La clas na Escandalera foi abierta pa tol públicu que quiso dir y cuntó con un mayestru d’asturianu pa deprender nociones básiques del idioma, dalgo, que según XPDL “deberie facese en toles escueles”. Na clas participaron tamién voluntarios qu’entrugaron por cosadielles al públicu asistente. La Xunta pola Defensa de la Llingua Asturiana quiso facer con esta iniciativa un llamáu a tola comunidá escolar, a los falantes y tou aquel que vive o trabaya n’Asturies pa que participara na movilización y dexara con ella nidia la so postura favoratible a que fine la discriminación colos asturfalantes.