David Rivas arrenuncia a encabezar la llista d’Andecha nes elecciones de mayu

Nuna sentida carta a la militancia d’Andecha Astur, unviada esti xueves 22 de febreru al Secretariu Xeneral del partíu nacionalista asturianu, Germán Abad, el que vien siendo candidatu dende va años, David Rivas, arrenuncia a encabezar la candidatura, faciendo entá más grave la crisis d’Andecha.

Sigún diz David Rivas, nesa carta a la militancia, “dempués de da-y vueltes a la situación pela que tamos pasando n’Andecha Astur y de falar con dellos collacios y delles collacies, comunícovos la mio decisión d’arrenunciar a encabezar la llista de la organización nes prósimes elecciones de mayu, pa lo que fora elixíu nel Conceyu Nacional entamáu n’Uviéu y fináu en Candás hai yá cuasi un añu”.

La carta, reproducímosla darréu na so totalidá: 2Nun voi calentavos la cabeza con argumentaciones ideolóxiques nin recurriendo a filosofíes polítiques porque nun ye’l casu. Si de daqué andamos sobraos ye d’ideoloxización estéril, al empar qu’andamos faltos de cintura estratéxica y d’una mínima sabiduría pa ponemos nos zapatos del otru. La mio decisión nun ye frutu d’un discursu teóricu, sinón de daqué tan cenciello como que ye imposible siguir asina ensin perder la racionalidá.

Nel conceyu –l’últimu celebráu conforme al reglamentu— tamién fora elexía una xunta executiva que ye llexítima n’orixe y n’exerciciu pero a la que dalgunos compañeros negáran—y esta segunda llexitimidá. Por eso, cuando hai dos o tres meses la convivencia pente nós entamó a facese perdifícile, precisamente por ser elixíu unánimemente como candidatu, creyera que’l mio deber, como representante tamién llexítimu, punxi tola fuercia posible nun intentu de mediación que, a la postre, nun llegó a bon puertu.

Pode que dalgunos nun atalantaran la mio posición o, al empar, yo nun supiera desplicala correchamente. Nin pretendí equidistancia –como escribí nun documentu internu que ye onde se debe delidiar nestos casos— nin muncho menos una ambigüedá calculada del tipu de “a ver quien gana” pa posicioname al final. Llevamos –porque nun tuvi solu nesa xera— dos meses o más intentando llegar a les elecciones de mayu careciendo de los menos güelpes posibles. Y trabayóse en silenciu, naguando polo meyor p’Andecha y pa la idega que toos defendemos. Paralelamente l’espectáculu de foros y páxines web ametía entá más problemes pa una salida pactada, una tregua, si queréis llamalo asina, na que yo, pola llexitimidá que’l vuesu votu unánime me diera en Candás, podía facer un serviciu importante. Nun fora posible. Una bona parte de la organización ya especialmente dellos siñificaos militantes prefirieran el conflictu.

Ye evidente qu’aquel consensu del Conceyu Nacional tá rotu y que, d’esta forma, la unanimidá d’entós queda tremendamente relativizao, por más que naide plantegó –polo menos onde tien que plantegase— un cambéu na candidatura. Non obstante, a los problemes surdíos d’esta rotura hai qu’ameter que’l fechu de tener decidía la candidatura a un nivel tan altu como ye un conceyu provocaba situaciones un tanto chusques nes negociaciones que se pudieren caltener. Total, que por hache o por be, la mio innegable llexitimidá d’orixe quedaba amenorgada a midía que s’exercía. Y, como colofón, de poco sirvieran los mios intentos –y, repito, tamién d’otres persones— p’algamar una mínima alcordada pente nosotros. Llegué a plantegar nun presentame a les elecciones y facer una llista de compromisu pa centramos namái que nes municipales, onde los problemes internos son prácticamente inesistentes. Nada fora posible.

Nun sé que pasará andaos unos meses. Los argumentos llegales y reglamentarios escápenseme porque, la verdá, nunca m’interesaran. Y los argumentos políticos tampoco nun me valen porque tán basaos, a lo menos la mayoría, en xuicios d’intenciones. Ya yo hai yá munchu tiempu que dexé de moveme por presunciones, por más qu’haiga vegaes que tengan una basa material más o menos defendible.

De toles formes, pase lo que pase, queden les sigles –¡probes sigles!— onde queden y permanezan n’activo unos, otros o los de más allá —dicir que n’Andecha hai dos llinies ye simplono a maza porque si nun hai cuatro o cinco habrá nueve o diez‐, lo que sí ye claro ye que tendremos que transitar per otres víes. Esi cambéu, que se va dar necesariamente, aconseya camudar tamién les cares y los perfiles de los que representaron o representamos estratexes anteriores. Yo siempres pensé qu’estes elecciones o, como muncho, les europees del 2010, sedríen les últimes pa min. Siguiendo un símil fubolísticu hai de mover bancu y tirar de cantera. El casu ye que la evolución de les circunstancies retírenme un poco enantes. Nada grave, nada que nun tenga igua.

Namái me queda agradecevos la confianza que siempres sopelexasteis haza mi ya espero que nun la traicionara munches vegaes; pero, si lo fixe, tenei la seguridá que nun fora a posta.

Un saludu caldial. ¡Puxa Andecha Astur! ¡Puxa Asturies soberana! ”
Carta de David Rivas a la militancia d’Andecha Astur