David Lozano participa esti sábadu nel Club Xuvenil de Llectura d’Avilés

David Lozano participa esti sábadu nel Club Xuvenil de Llectura d’Avilés a les 18 hores na Sala Allegro del hotel 40 Nuedos.

Va Presentar la so última novela, Desconocíos, premiu EDEBÉ de Lliteratura Xuvenil 2018  nun Club de Llectura que tien periodicidad mensual y les sos sesiones cunten cola presencia d’autores y autores destacaos na cultura xuvenil.

L’escritor, galardonáu apocayá col prestixosu premiu EDEBÉ de lliteratura xuvenil, va falar coles y los mozos sobro la tecnoloxía y les redes como ingrediente na narrativa xuvenil.

El Club Xuvenil de Llectura celebra con esta la so segunda xunta del añu tres l’ésitu collecháu a lo llargo de 2017 en que se llogró xenerar una audiencia constante d’alredor de mediu centenar d’asistentes per sesión. Antes de David Lozano, el mes pasáu, Avilés recibió la visita de Sebas G. Mouret, que faló sobro lliteratura xuvenil, l’oficiu d’escribir y diverses temes rellacionaes cola so obra.

El Club ta impulsáu pola Conceyalía de Cultura y entamáu pola biblioteca Bárganos Candamo cola collaboración de l’Asociación Cultural Celsius 232. Tien una periodicidad mensual y siempres cunta cola participación d’una figura destacada nel ámbitu de la cultura xuvenil, na mayoría de los casos rellacionada cola so proyección nes redes sociales.

David Lozano nació en Zaragoza en 1974. Ye llicenciáu en Derechu con estudios de Filoloxía Hispánica y Comunicación. N’empezando la so carrera lliteraria na Editorial Mira coles novela de terror y suspense L’Últimu Güéspede y La sienda del ébanu, qu’acabaría desbancando al so oficiu orixinal d’abogáu, David Lozano dirixió llueu los sos pasos como escritor al campu de la lliteratura xuvenil y asina, nel 2006, publicó en SM Onde surden les solombres y ganó con ella’l premiu Gran Angular cuntando una hestoria de mozos sumíos en participando nel mesmu xuegu online n’Internet.

Tamién en SM publicó de siguío la esitosa triloxía La Puerta Escura, formada poles noveles El Viaxeru, El Mal y Requiem, una epopeya fantástica sobre la llucha contra’l mal, anque cola peculiaridá de que ye l’elementu humanu’l qu’interfier nel mundu de los muertos.

Los sos siguientes llibros Cielu Coloráu y Herexía tamién apaecieron en SM, y Hyde, la siguiente, en Alfaguara. Poco dempués publicó la novela Valkiria, de nuevu cola solombra de les nueves tecnoloxíes como exa d’una trama d’intriga xuvenil y, como paez que ye capaz d’espurrir el tiempu, l’añu pasáu traxo sol brazu una novedá más, El lladrón de minutos, que’l so puntu de partida ye una entruga bien suxerente: ¿imaxines que’l día del to cumpleaños sume del calendariu?

Siguiendo cola so esitosa carrera lliteraria, hai malpenes unes selmanes recibió’l prestixosu premiu EDEBÉ cola que va ser la so próxima novela publicada: Desconocíos, de la que con toa probabilidá va falar en fondura mientres la so visita al Club Xuvenil de Llectura d’Avilés.