David Bowie nun va dar más conciertos

John Gidding, el manager de David Bowie, anunció esti día que’l cantante británicu considérase retiráu de los conciertos, magar siga faciendo música de cuando en vez.

El representante del Duque Blancu, como se-y noma, vieno acabante de declarar na revista Music Week, demientres una entrevista nel International Festival Forum (IFF) que “David ye unu de los meyores artistes colos que trabayé. Pero siempres que lu veo agora, antes siquier de falar, suelta ‘Nun voi faer más conciertos’, y yo contesto: ‘Nun toi preguntando”, comenta Giddings.

Inda Bowie sigui faciendo música , como se vio’l pasáu 6 d’ochobre cuando se presentó la tema pal estrenu de la serie británica ‘The Last Panthers’, creada por Jack Thorne y empobinada por Johan Renck. La serie va salir na pequena pantalla’l próximu 12 de noviembre en Reinu Uníu.

La cabera xira de Bowie foi nel ‘Hurricane Festival’ na ciudá alemana de Scheebel a finales de xunu de 2004. David Bowie taba promocionando’l so álbum ‘Reality’ (estrenáu en 2003) cuando tuvo dolores de pechu agudos mientres taba cantando. El so últimu álbum d’estudiu ye ‘The next day’ de 2013.