Portada Sociedá D’Andrés relaciona l’aumentu presupuestariu cola rede de normalización nos conceyos

D’Andrés relaciona l’aumentu presupuestariu cola rede de normalización nos conceyos

by asturnet

El responsable de la Oficina de Política Llingüística, Ramón d’Andrés Fernández, aprovechó la última sesión de les Xornaes sobre Normalización nos Conceyos pa confirmar que’l caltenimientu y espardimientu de la rede de servicios llocales “ye una prioridá absoluta” del so departamentu y relacionó directamente el 20 por cientu aumentáu nos presupuestos autonómicos en materia de promoción del asturianu con ello: “gran parte d’esi 20 por cientu va destinase a la rede”, aseguró.

Les primeres Xornaes sobre Normalización Llingüística nos Conceyos peslláronse en Xixón con una sesión de mañana dedicada a esponer el trabayu desenvueltu pola Oficina Municipal de la Llingua del conceyu agospiador per parte de la so responsable técnica María Xosé Fernández y na sesión de la tarde nuna ponencia de Ramón d’Andrés, siguida d’una mesa redonda colos cabezaleros de los cuatro servicios locales qu’anguaño esisten n’Asturies.Nel cursu de la so intervención, el Xefe de Serviciu de la Oficina del Principáu, confirmó que la puesta en marcha de la rede municipal ye xunto a la igua toponímica, una de les dos prioridaes fundamentales de l’acción del so departamentu. “El 20 por cientu que s’aumentó en materia llingüística repuende a la necesidá d’apoyar esa rede y bien d’eses perres van destinase a tal fin”, dixo d’Andrés. Respective a un de los tremores que manifestaron tolos cuatro responsables de les oficines normalizadores anguañu esistentes no tocante a la continuidá de los servicios, al marxe de clime políticos más o menos favorables, el representante de la Conseyería de Cultura apuntó la necesidá “d’amarrar bien les coses consensuando ente tolos grupos” representaos nes corporaciones “p’asegurar la continuidá del serviciu de normalización más alló de que cambien les coyuntures polítiques”, esti consensu había pasar per “dotar a les oficines de la estructura administrativa oportuna pa que naide les pueda tocar nun futuru”.

L’apoyu de l’adminstración asturiana foi otru de los elementos necesarios que Ramón d’Andrés calificó de “indispensable” pa la rede de servicios locales.

Una de les realidaes coles que se van tener d’enfrentar los planes de Política Llingüística, reconocio d’Andrés, ye la “de la diversidá qu’hai ente los 78 conceyos d’Asturies”, el representante del Principáu, añadió “paez obvio que falar de 78 servicios municipales nun tien sentíu, poles dimensiones que tienen munchos conceyos”, la mancomunación d’estes oficines diba ser una solución pa d’Andrés: “inda nun tenga correspondese coles mancomunidaes esistentes, pueden mancomunase servicios de conceyos limítrofes y siempre atendiendo a la realidá llingüística a la que pertenecen estos conceyos”, matizó, aludiendo al casu que pudieren presentar conceyos como los de la mancomunidá costera occidental de les Cinco Villes.

La posibilidá d’esparder la rede normalizadora inda s’amosaba como una quimera bien llonxana, tanto na intervención de Ramón d’Andrés como a les que la siguieron de los cuatro técnicos llingüísticos de Xixón, Llangréu, L.lena y Mancomunidá de Peñes. Na mesa redonda toos, incluíu’l responsable del gobiernu asturianu, coincidieron en que lo primero ye afitar los servicios qu’hai agora y dir apoyando la creación d’otros. Respective a les característiques qu’había tener una oficina local pa tener asegurada la so continuidá, la técnica del Conceyu de Xixón señaló tres imprescindibles: “presupuestu propiu, espaciu físicu propiu y personal propiu”. Nuna de les sos últimes intervenciones Ramón d’Andrés reconoció qu’hai “resistencies, hailes y diba ser una babayura negales”, al pesar d’estes rocees “presentes en tolos ámbitos de les administraciones”, el Xefe de Serviciu de la Oficina del Principáu quiso llanzar un guiñu d’optimismu moderáu refiriéndose al “clima positivu que ta algamando pocoñín a poco el reconocimientu social de la llingua” y una de les claves pa siguir avanzando nesti reconocimientu ye pa d’Andrés resaltar los valores positivos que puede tener la normalización del asturianu non namás nel ámbitu cultural sinón n’ámbitos económicos como por exemplu el turísticu y el sector servicios: “un conceyu que se distinga pola so política de promoción del asturiano o una empresa o comerciu qu’use esa llingua tan ufiertando un atractivu potencial a la xente, pensemos por exemplu énte los visitantes d’otres comunidaes qu’a menudo vienen buscando equí lo propio y distinto”, eso ye dalgo qu’inda nun se tien en cuenta n’amplios sectores sociales “anclaos nun conservadurismu decimonónicu qu’inda piensa que lo meyor ye tener una llingua namás y idees asemeyaes”, dixo d’Andrés.Respective a los planes más inmediatos de puesta en marcha de nueves oficines el responsable de Política Llingüística anunció la prósima creación “ya ta faciéndose la selección de personal” d’un serviciu en Sieru, otros conceyos interesaos en poner a funcionar servicios normalizadores seríen los integraos na Mancomunidá de la Sidra, Cangas, Avilés y la Mancomunidá de les Cinco Villes.

Tamién te podria gustar