Damián Barreiro gana’l premiu Fuertes Acevedo

Damián Barreiro Maceiras resultó ser el ganador de la ventena edición del Premiu «Máximo Fuertes Acevedo» d’Ensayu n’asturianu, que con una dotación de 3.000 euros concede la Conseyería de Cultura del Principáu d’Asturies. A esti gallardón podíen presentase obres de tema, xéneru y estructura llibres siempres que reunieren les característiques del xéneru ensayísticu na so amplitú.

El xuráu decidió por unanimidá, na so reunión del 12 de payares del 2014, conceder el Premiu al testu tituláu Caleya Sésamu: el papel de la televisión na tresmisión interxeneracional de la llingua, destacando, según consta nel acta, «la solidez documental y la bona estructuración d’una obra qu’analiza les posibilidaes de l’animación infantil como instrumentu favorecedor de les llingües minoritaries, avanzando propuestes concretes nel ámbitu de la normalización social de la llingua asturiana».

La obra foi presentada col seudónimu «Son Goku». Abierta la plica, l’autor ganador resultó ser Damián Barreiro.

Damián Barreiro (A Estrada, Pontevedra, 1984) ye periodista. Depués de formar parte de la plantiya del selmanariu Les Notícies, collaboró con otros medios de comunicación asturianos, como la Televisión Local de Xixón, el periódicu Diagonal Asturies o’l diariu La Nueva España, na so sección «Escolinos». Nel añu 2013 ganó’l Premiu d’Ensayu «Fierro Botas», convocáu pol Conceyu de Xixón, cola obra L’espeyu onde miranos: televisiones de proximidá n’Europa Occidental y procesos de recuperación identitaria.