Cultura pide evitar la llexía pa protexer el patrimoniu cultural del coronavirus

Cultura pide evitar la llexía pa protexer el patrimoniu cultural del coronavirus
20 abril 10:02 2020 Imprimir

El Ministeriu de Cultura vieno acabante pidir que s’evite usar la llexía pa protexer el patrimoniu cultural del coronavirus.

Non toa midida ye válida pa protexer el patrimoniu cultural de la Covid-19. Por ello, el ministeriu de Cultura y Deporte distribuyó una serie d’encamientos a les comunidaes autónomes pa garantizar que les práctiques de desinfección se faigan de forma correcta y evitar  asína que’l remediu sía peor que la enfermedá.

Nunca ye recomendable tocar de manera directa los bienes culturales pero esta premisa, nuna situación como la d’agora, ye inda más necesaria. Los virus solo pueden desenvolvese nos seres vivos pero la permanencia de partícules víriques (provenientes del contactu directu o pola cuspia) sobro les superficies puede suponer un focu d’andada. D’esta forma tamién se va evitar la necesidá d’aplicar productos de llimpieza o desinfección sobro los bienes culturales.

Na redolada directa de los bienes culturales (a menos d’un metro de distancia, como ceres próximes o zócalos d’edificios) va utilizase preferiblemente una disolución de etanol disueltu al 70% n’agua proyectada a baxa presión. Como indiquen les autoridaes sanitaries, esta solución desinfestante resulta efectiva frente al virus y de la mesma el so pulverización resulta menos dañible que la de hipoclorito sódicu (llexía) sobro materiales como la piedra, el lladriyu, la madera y el metal.

Tienen d’evitase amiestos de productos ensin conocer de mano la so compatibilidá. Ye’l casu de la conocida reacción ente la llexía (hipoclorito sódicu) y l’amoniacu que xenera vapores d’elevada tosicidá. Na desinfección por aciu pulverización d’espacios cercanos a los bienes culturales (por casu, cascos históricos, places públiques, parques o cais) va evitase rociar de manera directa los oxetos o edificios de valor históricu-artísticu.

Los tratamientos desinfestantes van evitase siempres nes proximidaes de los bienes culturales policromaos (por casu portaes d’ilesies o retablos) siendo muncho más recomendable’l valláu perimetral pa evitar l’aproximamientu y contactu directu de les persones.

Tolos procesos de llimpieza y desinfección van realizase siempres colos correspondientes EPIs que garanticen la seguridá del personal trabayador. Énte cualquier dulda colos procesos de llimpieza y desinfección lo meyor ye nun aplicar nengún tratamientu, yá que pueden xenerase daños irreversibles sobro’l patrimoniu cultural. Lo más recomendable ye consensuar toles midíes colos profesionales del ámbitu del caltenimientu-restauración.

  Categories: