Cultura formaliza’l conveniu pa la creación de la Biblioteca de Poesía Asturiana

12 marzu 10:02 2012 Imprimir

El Conseyu de Gobiernu del Principáu d’Asturies, na so xunta de 1 de marzu de 2012, autorizó la formalización d’un conveniu ente la Conseyería de Cultura y Deporte y la Fundación Aula de las Metáforas pa la creación y el desenvolvimientu de la Biblioteca de Poesía Asturiana.

La puesta en marcha d’una Biblioteca de Poesía Asturiana qu’axunte tolos títulos publicaos en dicha llingua nel senu de la Fundación Aula de las Metáforas, asina como les actividaes d’espardimientu tantu n’Asturies como nes sos árees d’influencia, va contribuyir a la meyor conocencia y apreciu de la poesía asturiana, a la so ordenada contextualización nel ámbitu de la creación poética actual y a la meyor promoción y puesta en valor de la poesía y los poetes en llingua asturiana, oxetivos toos ellos del Gobiernu d’Asturies al traviés de la so Dirección Xeneral de Política Llingüística.

La Fundación Aula de las Metáforas ye una entidá ensin ánimu d’arriquecimientu y ente los sos fines fundacionales ta’l promover, entamar y executar tou tipu d’acciones culturales que contribuyan al desenvolvimientu, espansión y proyección social de l’Aula de las Metáforas “Fernando Beltrán”, biblioteca poética y centru de creación, espardimientu y dinamización de la poesía allugada na Casa de Cultura de Grau; asina como caltener, protexer ya incrementar los fondos editoriales y oxetos artísticos que se guarden nel Aula de las Metáforas “Fernando Beltrán”, asegurando y facilitando’l so usu públicu. Pa ello, la Fundación va favorecer intercambios y collaboraciones con fundaciones, asociaciones ya instituciones culturales y cuantes entidaes y persones, físiques y xurídiques, compartan idénticos oxetivos.

El Conveniu autorizáu foi soscritu pola Fundación Aula de las Metáforas en fecha 8 de xunu de 2011 y n’aplicación del mesmu la Conseyería de Cultura realizó una donación de llibros de poesía n’asturianu que sirvieron pa crear la Biblioteca de Poesía Asturiana. La vixencia d’esti conveniu estiendese hasta’l 31 d’avientu de 2012. Nel protocolu de collaboración, el Principáu d’Asturies, al traviés de la Dirección Xeneral de Política Llingüística, comprométese a:

a) Collaborar na actualización de dicha Biblioteca cola donación añal de nuevos títulos de poesía asturiana que puedan editase y de los que se disponga nel fondu bibliográficu de la Dirección Xeneral mentada.

b) Desenvolver en collaboración cola Fundación Aula de las Metáforas toa clase d’actividaes ya iniciatives empobinaes a la promoción de la poesía en llingua asturiana n’Asturies y en tolos sos ámbitos d’actuación ya influencia, asina como a collaborar na midida de lo posible coles iniciatives que la Fundación Aula de las Metáforas promueva dientro del espíritu del Conveniu. Lo que se refier a la posibilidá de realizar actividaes conxuntamente nel marcu de programes d’actuación de promoción de la lliteratura en llingua asturiana desenvueltos pola Conseyería de Cultura y Deporte como la Selmana de les Lletres Asturianes. Neses actividaes la Fundación Aula de las Metáforas collaboraría facilitando l’espaciu físicu pa la so realización y los medios materiales y humanos necesarios pa la so execución.

  Categories:
Loading Facebook Comments ...