Portada Sociedá Cultura desaira a la SGAE y refuga participar nun alderique internu

Cultura desaira a la SGAE y refuga participar nun alderique internu

by redacción asturnews

Xube la presión para la SGAE tres el so catastróficu fracasu na votación de nuevos estatutos: la presidenta de la entidá propón a Guirao intervenir nun diálogu urxente” y él torna la ufierta para caltener la neutralidá del Ministeriu. 

Cuando inda resona’l golpe suicida de la non aprobación de los nuevos estatutos que la Cultura esixía a la SGAE so pena de quita-y de l’autorización alministrativa, la tensión ente’l Ministeriu y l’entidá xestora de derechos d’autor xubía un pocu más la selmana pasada cola negativa de José Guirao a participar, como-y pidía la presidenta de la organización, Pilar Jurado, nuna mesa de diálogu urxente”.

Jurado propunxera esi diálogu ente les editoriales de televisión y les multinacionales discográfiques, con intervención coles mesmes de Cultura, pa tratar de poner paz na engarradiella qu’esos dos colectivos empresariales caltienen en redol a la esplotación de derechos de la música que s’emite nes canales televisives. La máxima responsable de la SGAE aducía que les trés partes, incluyíu’l Ministeriu, son “actores claves pa desbloquiar la entidá”.

La presidenta de la SGAE escorría asina, según indicó nuna nota, algamar “el consensu y l’alcuerdu necesarios pa superar les diferencies qu’enfrenten” a esos axentes “y torguen el óptimo desenvolvimientu de la entidá por aciu el cumplimientu del últimu requisitu pa completar la so reforma”, esto ye, l’aprobación d’unos estatutos acordes a la nueva lexislación española y europea en materia de propiedá intelectual.

Díes p’atras, l’Audiencia Nacional tornara la solicitú d’intervención xudicial que Cultura cursara contra la SGAE. Pero’l tribunal nun entró no fondero del asuntu y llindóse a señalar que nun ye competente, polo que’l Ministeriu, que recurrió aína’l resolvimientu, podría allegar a otru órganu xurisdiccional en busca del vistu bonu llegal pa la intervención. Eso ensin perxuiciu de que Cultura exerza la so facultá de suspender l’autorización ensin la cual la SGAE nun puede operar, anque esta ye xuna midida estrema que daría la puntilla a la entidá.

Tamién te podria gustar