Portada Cine Cultura d’Avilés programa 31 actividaes nos Centros Culturales

Cultura d’Avilés programa 31 actividaes nos Centros Culturales

by redacción asturnews

D’abril a mayu, los Centros Socioculturales de Versalles/Los Canapés, La Lluz y La Carriona van bullir d’actividá, cola programación preparada dende la conceyalía de Cultura d’Avilés, qu’axunta 31 propuestes, presenciales y telemátiques, qu’inclúin teatru y cine familiar, bebecuentos y cuentacuentos, la XV Amuesa de Teatru Amateur y espaciu para la cultura asturiana.

Les actividaes destinaes a la infancia y a les families cunten con un especial protagonismu, cola vuelta de les sesiones con públicu, si caltien l’actual situación sanitaria frente al COVID-19.

El Teatru Familiar llega con siete sesiones: trés en Versalles, dos en La Lluz y dos en La Carriona, al cargu de compañíes y artistes asturianos. Tamién sigue, per segundu mes, el acabante estrenar Cine Familiar nos barrios, con dos nueves propuestes fílmicas, “La famosa invasión de los osos en Sicilia”, n’abril, y “Onward”, en mayu.

Los y les más pequenes van poder esfrutar de nuevu de los cuentacuentos (de 4 a 9 años) y los bebecuentos (hasta 3 años), treslladaos a la rede. Podrán siguise de forma telemática al traviés de la canal de Youtube del Conceyu y la cuenta de Facebook de les biblioteques municipales d’Avilés.

La cultura asturiana atopa una vegada más el so espaciu, colos talleres presenciales “Les tradiciones suenen y empresten”, nos que los neños y les neñes de 6 a 10 años van aprender de forma risondera música y alfarería.

Tamién vuelve unu de los emblemes de la programación, les funciones teatrales para adultos de l’Amuesa de Teatru Amateur, qu’algama la so XV edición colo meyor de les compañíes aficionaes.

Toles propuestes son d’asistencia gratuita, previa recoyida d’invitación nos centros socioculturales nos que va tener llugar l’actividá, con toles garantíes de protección sanitaria frente a la pandemia.

Ver Programación

Tamién te podria gustar